SHBA nuk e kanë ende një emër fitues që do shkojë në Shtëpinë e Bardhë, ndonëse demokrati Joe Biden është në avantazh me 264 vota ndërkohë që Donald Trump ka arritur të mbledhë 214 vota.
Biden mori 28.833 vota më shumë se Presidenti në detyrë nga votat e numëruara deri më tani në Pensilvani. Një fitore e Pensilvanisë do të fuste në “xhepin” e Biden, 20 vota elektorale të shtetit dhe do të çonte atë direkt në fitoren e Shtëpisë së Bardhë, me 270 vota elektorale.
Ndërsa numërimi i fletëvotimeve me postë në Allegheny ende vijonë. Kjo zonë njihet me prirje demokratike, që përfshin edhe qytetin e Pittsburgh.
Nga ana tjetër, disa zyrtarë të Trump janë shprehur për televizionin CBS News se situata në Shtëpinë e Bardhë ka qenë e tmerrshme, ku disa prej punonjësve të Presidentit nuk janë paraqitur në punë.Teksa ai bën premtime përmes Twitter për një sfidë ligjore në mënyrë që të rizgjidhet, ndihmësit e tij thonë se ai mund t’i bëjë një tjetër fjalim para kombit përsëri mbrëmjen e së premtes.
Duke përmendur mashtrime të përhapura, e vjedhje votash për të cilat nuk është dhënë ende asnjë provë, fushata Trump po zhvillon një luftë shteruese ligjore për të sfiduar numërimin e votave në shtete të tilla si Georgia, Arizona, Pensilvania dhe Nevada ku gara ende vijon.
