Turizmi ishte një nga sektorët më të goditur nga pandemia. Që nga viti i kaluar agjencitë turistike dhe operatorët presin ndihmë nga qeveria shqiptare për të mos i çuar drejt fundit këto biznese. Megjithëse jemi në prag të sezonit turistik, situata paraqitet ende shumë e vështirë për këtë sektor.
Kreu i Shoqatës së Operatorëve Turistikë për Jugun, Vasil Bedinaj, ka treguar se qeveria nuk ka dhënë asnjë lloj ndihme në këtë kohë të vështirë dhe kjo ka sjellë që shumë agjenci të shpallin falimentin.
“Zero ndihmë nga qeveria shqiptare për turizmin, me keqardhje them se shume subjekte, agjenci turistike agjenci transporti kanë shpallur faliment. Të pakta kanë qenë subjektet që kanë përfituar kredinë e dhënë nga qeveria, e cila nuk ka ndonjë vlerë të caktuar pasi nuk ishte ndryshim nga një kredi normale e marrë në një nga bankat e nivelit të dytë në vend. Jemi pesimistë në kërkesat ndaj qeverisë pasi flasim e s’na dëgjon njeri, prandaj po përpiqemi të mbijetojmë me forcat tona ne që kemi ngelur se po të ishte një situatë ndryshe të kishim mbështetje do të kishte 100 operatorë turistikë të rinj, pasi çdo investitor i huaj sheh një herë legjislacioni shqiptar dhe çfarë përkrahjeje kanë nga shteti dhe Shqipëria është vendi i fundit në Europë për përkrahjen e dhënë nga shteti në sektorin e turizmit”, tha z. Bedinaj.
Çfarë u bë me miliona eurot që qeveria shqiptare mori për pandeminë?
Qeveria shqiptare ka marrë 500 milionë euro borxh për pandeminë dhe ka shpenzuar deri më tani vetëm 200 milionë prej tyre. Teksa ishte i ftuar pak ditë më parë në emisionin “Të Paekspozuarit” nga Ylli Rakipi, kryeministri Rama pranoi me gojën e tij se paratë e marra borxh për pandeminë janë shpenzuar për rindërtimin dhe jo për pandeminë e bizneset që u goditën më fortë.
“Ne nga pandemia, kemi marrë një goditje 700 milionë. E kemi marrë në të ardhura. Na kanë rënë të ardhurat e shtetit. BB thotë që qeveria shpëtoi 50 mijë vende punë. Nuk ka lek për pandeminë vetëm. Na kanë rënë të ardhurat. Kemi financuar rindërtimin, përjashto lagjen në Kurbin, të gjithë e kemi financuar me paratë tona. Shkollat që kemi parë i kemi financuar ne”, u shpreh Rama.
Nëse milionat e marra borxh nuk do të ishin shpenzuar për rindërtimin, ashtu siç kryeministri vetë u shpreh, sot bizneset nuk do të ishin në këtë gjendje dhe nuk do t’i luteshin më qeverisë për bonuse.
Shpresa e vetme për turzimin mbetet vaksinimi
Duke qenë se ndihma nga qeveria ka munguar totalisht, tashmë për agjencitë dhe operatorët turistik shpresa e vetme mbetet vaksinimi masiv. Nëse deri në qershor do të vaksinohet pjesa më e madhe e popullsisë, hotetelet dhe bizneset që mbahen nga turizmi do të mund t’i rikthehen punës normalisht.
“Vaksinimi masiv është një shpresë që deri në qershor situata do të qetësohet. Edhe ky vit mendoj do të vijojë me kufizime për ardhjen e turistëve të huaj por ne do të fokusohemi tek vendet fqinj si vitin e kaluar Maqedonia Kosova. Prenotimet kanë nisur por për shkak të pandemisë ndodh që shpesh ato kancelohen dhe kjo tregon një pasiguri të agjencive. Nga qeveria shqiptare kërkojmë vaksinimin sa mè parë të punonjësve që kemi në mënyrë që të ofrojmë një siguri më të lartë për pushuesit që do të zgjedhin Vlorën”, është shprehur Adnand Aliaj, administrator hoteli, për “Euronews Albania”.
