Presidenti ukrainas Volodymyr Zelensky iu drejtua vendit të tij duke i quajtur ukranasit “njerëzit më të fortë në botë”.
“Ne po vijmë në fund të një jave tjetër. Lufta jonë është për lirinë, për shtetin. Një javë tjetër që Ukraina është gjallë, pavarësisht përpjekjeve të rusëve për të na shkatërruar. Ne jemi duke luftuar. Ne jemi duke u mbrojtur”, tha Zelenksy.
Presidenti ukrainas tha se Rusia e ka “humbur lidhjen me realitetin deri në atë pikë sa të na akuzojë se kemi kryer atë që padyshim kanë bërë trupat ruse”.
Ai shtoi se nga frika e humbjes, Rusia do të vijojë me sulme të forta në lindje të Ukrainës.
Nga ana tjetër, Rusia ka emëruar një zyrtar të ri për të mbikëqyrur luftën në Ukrainë.
Kremlini ka vendosur ta emërojë në krye të luftës në Ukrainë, gjeneralin e ushtrisë, Aleksandr Dvornikov, i cili komandon forcat ruse në distriktin ushtarak jugor, tha në një intervistë për CNN, këshilltari i Sigurisë Kombëtare të SHBA-së, Jake Sullivan.
Rusia ka pësuar humbje serioze që nga fillimi i pushtimit të Ukrainës më 24 shkurt, duke dështuar të pushtojë qytetet kryesore, përfshirë kryeqytetin e Kievit.
Në fillim të këtij muaji, Rusia njoftoi se do të tërhiqte trupat që sulmonin nga veriu dhe do t’i rivendoste ato në lindje, ku Kremlini po kërkon të rrethojë forcat ukrainase.
Dvornikov, 60 vjeç, shërbeu në Çeçeni në vitet 1990 dhe në vitin 2015 u bë komandanti i parë rus që drejtoi operacionet ushtarake në Siri.
Që nga viti 2016 ai ka mbikëqyrur rrethin ushtarak jugor, i cili përfshin Krimenë, gadishullin ukrainas të pushtuar nga Rusia më 2014.
Dvornikov ka një reputacion famëkeq për sjelljen e tij gjatë luftës në Siri, ku Rusia bombardoi rrethet civile. Putin i dha Dvornikovit medaljen Hero i Rusisë, një nga çmimet më të larta të vendit, për punën e tij në Siri.
Dvornikov ka qenë “lloji i ekzekutuesit që ne kemi parë të ndjekë këto lloj fushatash [në Çeçeni dhe Siri], ku ka shumë sulme të tmerrshme civile, shkatërrim civil,” tha gjeneral-lejtnant në pension, Mark Hertling në një intervistë për CNN. .
Hertling tha se Kremlini do ta shtyjë Dvornikovin të “sigurojë sukses” deri më 9 maj, festa kombëtare për të përkujtuar fitoren e Bashkimit Sovjetik ndaj Gjermanisë naziste.
Dita e Fitores, siç quhet ndryshe, është një nga festat më të rëndësishme të Rusisë dhe përmban një paradë ushtarake.
Sullivan i tha CNN-it në një intervistë se Shtetet e Bashkuara do të vazhdojnë të mbështesin Ukrainën me armë.
Lufta në Ukrainë ka nisur më 24 shkurt, pasi trupat ruse nisën ofensivën në këtë shtet.
Presidenti rus, Vladimir Putin e ka quajtur pushtimin e Ukrainës një “mision special ushtarak” ndërsa sulmit i parapriu njohja si të pavarura e dy rajoneve separatiste në Ukrainë.
