Në qendër të këtij “Big Brother 9” do të jenë historitë e dashurisë, mes tyre edhe një lidhje mes dy vajzave që kanë vendosur të dalin publikisht dhe të thyejnë tabutë.
Një vajzë lesbike që merr riskun të rrëfejë historinë e jetës së saj në ekran.
Burime nga gazeta “Panorma” thonë se, bëhet fjalë për një vajzë nga Tirana, rreth moshës 30 vjeçe, e cila në këtë lojë me të dashurën e zemrës dhe quhet Kejda Jahja. Ajo do ta jetojë lidhjen e saj para kamerave, me ambicien për të fituar çmimin e madh që mendohet se e kalon shifrën 100 mijë euro.
Por çapkënia brune, që anëtarët e komunitetit LGBTI e thërrasin shkurt Kej, nuk është fare e panjohur për publikun. Tri vite më parë ajo doli me zë e figurë duke pohuar “Po, unë jam lesbike”, në dokumentarin e titulluar “SkaNdal”, premiera e të cili u transmetua në një kinema të Tiranës, në maj të vitit 2014. Kejda mund të themi se ishte personazhi kryesor i dokumentarit, i realizuar me nismën e Xheni Karajt dhe Kristi Pinderit, dy përfaqësuesit e Aleancës Kundër Dikriminimit (LGBTI) në Tiranë.
“Unë kam qenë e vetmja që në moshën 13vjeçare ia kam bërë të ditur si familjes sime, ashtu dhe shoqërisë që më rrethonte, faktin që unë jam lesbike, dhe se jam krenare që jam e tillë. Këto janë ndjenjat e mia, ndaj nuk mund të shtirem ndryshe. Jeni të lirë të më pranoni, ose të mos më pranoni!”, shprehej Kejda Jahja në rrëfimin përmbyllës në dokumentar.
