Është gjetur në një minierë të shtetit afrikan të Botsvanës një nga diamantet më të mëdhenj në botë.
Guri i çmuar prej 2492 karatësh u zbulua në minierën Karowe, në veri-lindje të Botsvanës, nga kompania kanadeze Lucara Diamond Corp, e cila nuk dha detaje të mëtejshme për vlerën e tij apo pastërtinë.
Për sa i përket karatëve, guri është një rival i denjë i diamantit më të madh të gjetur ndonjëherë, i quajtur Cullinan dhe i zbuluar në Afrikën e Jugut në 1905.
Kompania nuk ka zbuluar ende vlerën e perlës apo ka dhënë detaje mbi cilësinë e saj. William Lamb, CEO dhe president i Lucara, tha se ishte i emocionuar me zbulimin e këtij guri të jashtëzakonshëm, duke nënvizuar se ai është “një nga diamantet e papërpunuara më të mëdha të zbuluara ndonjëherë”.
Zbulimi u bë i mundur falë teknologjisë së avancuar të kompanisë Mega Diamond Recovery me rreze X që e lejon atë të identifikojë gurët me vlerë të lartë në depozitën kryesore minerale pa i thyer ato.
