Vjedhja e orëve të shtrenjta të personazheve të famshëm nuk është aq e çuditshme në vendin tonë. Por historia këtë herë është ndryshe nga sa ndodhi gjatë vizitës së George W Bush nëntë vite më parë, ku gjatë një pritje me qytetarët e Fushë-Krujës atij iu mor ora, fakt të cilin shumë e përgënjeshtruan.
Këtë herë pre e grabitjes është bërë këngëtari Getoar Selimi. Shtëpia në të cilin ai banon bashkë me partneren Marina Vjollca u grabit pak ditë më parë, në momentin që çifti nuk ndodhej në shtëpi.
Mësohet se autore e kësaj ngjarjeje është vajza 17- vjeçare e pastrueses, që çifti kishte punësuar për t’u kujdesuar për shtëpinë, gjatë kohës që ata nuk ndodheshin aty.
Vajza me inicialet D.K., tashmë e arrestuar, gjatë kohës që shoqëronte të ëmën teksa pastronte shtëpinë, ka marrë fshehurazi saj orën e markës “Hublot” të Getoarit dhe më pas është larguar bashkë me nënën drejt shtëpisë së saj në Kamzë.
Sipas policisë, atje vajza është takuar me të dashurin e saj, Mërgim Lala, po ashtu i arrestuar dhe ia ka dhënë atij orën që kishte vjedhur, e cila u gjet më pas në shtëpinë e këtij të fundit.
Në fakt nuk jemi duke folur për një orë të thjeshtë, por për një aksesor të markës “Hublot”, që arrin deri në vlerën 35 mijë euro. Ndaj dhe këngëtari nuk e kishte të vështirë të vinte re mungesën e saj.
