Rreth 100 vezë dinosaurësh të fosilizuara, me madhësinë e një pjepri të vogël, janë zbuluar në jug të Francës, në një nga zbulimet më interesante paleontologjike të viteve të fundit. Vezët u gjetën pranë Muzeut dhe Parkut të Dinozaurëve në qytetin bregdetar Mèze dhe mendohet se datojnë prej rreth 72 milionë vitesh, gjatë periudhës së Kretakut të Vonë.
Sipas studiuesve, vezët i përkisnin titanosaurëve, dinosaurë gjigantë barngrënës me qafë të gjatë, të cilët arrinin deri në 15 metra gjatësi dhe peshonin deri në 20 tonë. Gjeologu Alain Cabot, themelues i muzeut, deklaroi se zona mund të fshehë edhe miliona vezë të tjera nën tokë.
Ekspertët besojnë se përmbytjet dhe sedimentet e lumenjve kanë ndihmuar në ruajtjen e vezëve për miliona vite. Cabot shpjegoi gjithashtu se dinosaurët riktheheshin vazhdimisht në të njëjtën zonë për të lëshuar vezët, njësoj si tufat e kafshëve migratore në Afrikë.
Zbulimi ka ngjallur interes të madh në Francë, ndërsa disa shkencëtarë mendojnë se vendi mund të kthehet në një nga depozitat më të mëdha të vezëve të dinosaurëve në botë. Megjithatë, paleontologë të tjerë janë më të rezervuar, duke theksuar se fosile të ngjashme janë gjetur edhe më parë në jug të Francës.
Cabot insistoi që vezët të mbeten në vendin ku u zbuluan, për të shmangur shitjen apo zhdukjen e tyre nga koleksionistët privatë.
