Të paktën 10 persona janë shoqëruar në komisariat pas atentatit që ndodhi mbrëmjen e djeshme në qytetin e Durrësit, ku mbeti i vdekur miku i Emiljano Shullazit, Edison Harizaj 39 vjeç si dhe u plagos Geci Caci, 33 vjeç.
Ngjarja u regjistrua në zonën e plazhit, në rrugën e njohur si ‘Rruga e Çamëve’, ku Edison Harizaj dhe Genci Caci po udhëtonin me automjetin tip “Audi” kur u qëlluan me breshëri kallashnikovi.
Pas ngjarjes autorët janë larguar me shpejtësi, ndërsa një makinë pa targa tip “Benz”, e cila dyshohet se u përket autorëve është gjetur e djegur në Shën Vlash.
Kush është Edison Haziraj
Viktima Edison Haziraj është një emër i njohur për policinë. Ai ka qenë më parë nën hetim për vrasjen e bujshme të gjyqtarit të Vlorës, Skerdilajd Konomi.
39-vjeçari ishte me precedent të mëparshëm penal dhe njihej si një nga personat më të rrezikshëm të Vlorës.
Edison Harizaj ishte mik i ngushtë i Emiljano Shullazit dhe njihej si “Edison Faqedjeguri”, pasi në moshë të vogël kishte pësuar një djegie në faqe.
“Newsbomb” shkruan se emri i tij është i lidhur edhe me zhdukjen e Albano Xhaferrit në Vlorë, por edhe ngjarje të tjera kriminale. 39-vjeçari dyshohej se vinte gjoba në Vlorë, merrej me trafik droge dhe vendosje eksplozivi.
Dëshmitari: Mu duk sikur shpërthyen mina
Viktima Edison Haziraj dhe miku i tij që drejtonte makinën, Geci Caci, ishin në dijeni se po i ndiqnin me makinë.
Për t’u shpëtuar atentatorëve ata kaluan rrugën kryesore për t’u futur në këtë rrugë dytësore, por sapo bënë vetëm 20 metra u përballën me një breshëri automatiku duke e pasur të pamundur të lëvizin.
Një dëshmitar që dëgjoi zhurmën tregon për “ABC News” se iu duk si shpërthim minash gjuajtja me automatik.
“Ishte zhurmë shumë trishtuese sepse nuk dëgjohen zhurma të tilla. Mendova se mund të shpërthejnë mina, absolutisht nuk e mendova ashtu. Vetëm që fëmija dhe gruaja u trembën shumë”, u shpreh ai.
