Publikimi i fytyrave të prindërve të 13-vjeçares së abuzuar në Kavajë shokoi ditën e djeshme opinionin publik. Babi dhe gjyshi i të miturës shprehnin mbështetjen e tyre për vajzën, ndërsa kërkonin privatësi për çështjen.
Ndërsa media nuk nxori asnjë detaj për identitetin e 13-vjeçares, zbulimi i imazhit të prindërve të saj nga kryeministri Edi Rama përmes një video, nuk u prit aspak mirë nga qytetarët dhe politika shqiptare.
Lidhur me këtë çështje “News24” iu drejtua kreut të Mbrojtjes së të Dhënave Personale, Besnik Dervishi, i cili u shpreh se do të bëhet vlerësimi i duhur në raport me parimet dhe dispozitat e ligjit “Për mbrojtjen e të dhënave personale”.
Në rast se do të konstatohen elementë të shkeljes së tij, do të ndiqen procedurat ligjore të hetimit administrativ, në përfundim të të cilave do të dilet me aktin përkatës.
Deklarata e plotë:
Zyra e Komisionerit është njohur me ngjarjen të cilës ju i referoheni, nëpërmjet medias.
Zyra e Komisionerit, ashtu si edhe për të gjitha rastet e tjera, do të bëjë vlerësimin e duhur të çështjes, në raport me parimet dhe dispozitat e ligjit nr. 9887/2008 “Për mbrojtjen e të dhënave personale”, i ndryshuar.
Në rast se do të konstatohen elementë të shkeljes së tij, do të ndiqen procedurat ligjore të hetimit administrativ, në përfundim të të cilave do të dilet me aktin përkatës.
Zyra e Komisionerit e konsideron shumë të rëndësishëm bashkëpunimin me organet e medias, në funksion të respektimit dhe garantimit të të drejtave dhe lirive themelore të qytetarëve, ku bën pjesë edhe mbrojtja e të dhënave personale, e sanksionuar në nenin 35 të Kushtetutës së Republikës së Shqipërisë.
Burimi: News24
