Presidenti i KOKSH, Fidel Ylli, organizoi një mbledhje me Ministrinë e Sporteve dhe propozimi i tij është hapja e basteve sërish me pretendimin që një pjesë e të ardhurave që mblidhen nga taksat të shkojnë për sportin.
“Ne duam që këto para t’i kontrollojë qeveria, jo Federata, as KOKSH-i, por vetë qeveria sepse mbledh të ardhura jo vetëm për sportin. Janë miliona euro, e dinë të gjithë. Ato para të shkojnë për sportin, për këto kampionë që janë këtu me mua që e kanë nderuar Shqipërinë.
Ne patëm një mundësi që na dhanë 200 milionë lekë Ministria për në Olimpiadë dhe ne ia akorduam sportistëve tanë që të stërviten dhe me ato stërvitje dhanë rezultat, me një kampionë bote dhe dy medalje të tjera në stilin e shkëputjes në Uzbekistan.
Ne nuk duam që të nxjerrim atletët tanë që me trofetë dhe me medaljet e tyre të bëjnë grevë përpara kryeministrisë, por të sensibilizojmë qeverinë dhe kryeministrin. Janë miliona lekë, që i ka krimi. Të gjithë e dimë dhe asnjë nuk flet.
Ato para më pas të bëhen qendra Olimpike, sepse sporti nuk është një garë, por cilësi jete. Nuk mjaftojnë stadiumet e reja dhe zyrat, sepse nuk më duhen zyrat e KOKSH dhe projekti 5 milionë euro nëse këto projekte nuk balancohen me buxhetet e federatave”, u shpreh Ylli.
Në fakt, bastet sportive informale kanë qenë të hapura gjatë gjithë kohës pavarësisht urdhërit për mbyllje të çdo pike basti. Qëndrimi i tyre hapur, kundër rregullave, ka shtuar më shumë korrupsionin tek policët e insitucioni i Policisë së Shtetit.
Pjesë nga peticioni:
Nuk po propozojmë hapjen e gjithë gamës së lojërave të fatit që përfshin dhe kazinotë elektronike apo sallave të bingos. Propozimi ynë përfshin transparencë fiskale totale, baste sportive online të rregulluara me ligi. Operatorë ekonomikë të certifikuar dhe përfshirjen e operatorëve globalë seriozë, si dhe vendosjen e limitit të moshës apo të një kufiri maksimal monetar. Rregullimi me ligj i basteve sportive në funksion të sportit është një praktikë e ndjekur nga shumë shtete perëndimore. Në këto shtete të ardhurat nga bastet sportive përdoren për zhvillimin e sportit, e infrastrukturës sportive si dhe për të mbështetur rininë.
Sipas peticionit vendimi për mbylljen e lojërave të fatit ne dhjetor 2018 ka qenë i drejtë për kohën. sepse kanë qenë të përhapura vend e pa vend. Por, bastet sportive vazhdojnë të jenë në informalitet dhe kjo ka bërë që të ardhurat nga kjo veprimtari ti shkojnë krimit.
