Olsi Qalliaj, 22-vjeçari i arrestuar për vrasjen e Jurgen Kurtit, ka dhënë dëshminë e tij dhe ka treguar kur ka qenë hera e fundit që është takuar me Klodian Banen, i dyshuar si personi që ekzekutoi atentatin.
Në dëshmi ai thekson se nuk ka ndonjë marrëdhënie të afërt me të dhe thotë se e njeh prej rreth një viti përmes miqve të tij Alesio dhe Elsi.
Por vetëm 4 ditë para ekzekutimit të Jurgen Kurtit, Qalliaj e ka takuar Klodian Banen dhe i ka marrë çelësin për të fjetur në apartamentin e tij. Një fakt që tregon se lidhja e tyre ka qenë shumë më e ngushtë seç ai shprehet.
“Klodianin e kam njohur para rreth një viti në një lokal në Fier, nëpërmjet Alesios dhe Elsi Leventit. Nuk kam pasur ndonjë marrëdhënie të afërt me të. Ndërsa Levendin e kam njohur që në shkollë të mesme dhe më përpara në Patos. Me Elsin kam marrëdhënie shoqërore. Unë Klodin për herë të fundit e kam takuar ditën e enjte, javën e kaluar në afërsi të Komunës së Parisit, ku i kam marrë çelësat e apartamentit që ai kishte në zonën e liqenit të Thatë në Tiranë, pasi doja të qëndroja tek kjo shtëpi pasi nuk kisha ku të flija. Unë atë ditë kam shkuar në apartament rreth orës 22:30 dhe aty nuk kam gjetur ndonjë person në shtëpi. Para ditës së enjte nuk e mbaj mend saktësisht se kur e kam takuar Klodianin”, mëson “Shqiptarja.com”, dëshminë që Olsi Qalliaj ka dhënë në polici.
Edhe pse vetëm 22 vjeç, Olsi Qalliaj nga Fieri bënte një jetë mjaft luksoze, me makina super të shtrenjta dhe luksoze dhe udhëtime me skaf që i ekspozonte në rrjetet sociale.
Tre të rinjtë Esli Levendi 21 vjeç, lindur në Athinë/Greqi dhe banues në Tiranë, Alesio Berberi 33 vjeç lindur në Patos, Olsi Qalliaj, 22 vjeç, lindur në Fier dhe banues në Patos, që u arrestuan dje për vrasjen e Jurgen Kurtit, ishin paguar me 30 mijë euro për të kryer “porosinë” dhe kishin mbi 2 javë që e ndiqnin viktimën.
