Janet Jackson sapo është futur në listën e yjeve që kanë folur mbi shendetin mendor dhe depresionin, një problem i madh që duket se çdo ditë e më shumë po rritet mes njerëzve.
Këngëtarja 52-vjeçare së fundmi është shfaqur në revistën “Essence”, botimin që do të shfaqet në korrik- gusht me temën “Çështja e lumturisë”.
Ajo ka treguar për revistën prestigjoze udhëtimin e saj në jetë për të gjetur lumturinë përgjatë viteve.
“Kur është fjala për lumturinë, unë nuk jam eksperte. Kam vetëm përvojën time të jetës si një udhërrëfyese. Unë kam njohur lumturi të madhe dhe trishtim të madh “- ka thënë Jackson.
Duke përdorur këtë përvojë jetësore, Jackson kujton momentet e saj të lartësisë dhe të rënies që përjetoi gjatë dekadave të ndryshme të jetës së saj, duke filluar me fëmijërinë.
“Isha e lumtur kur vëllezërit e mi vinin në shtëpi. Isha e lumtur kur nëna ime më jepte me dashuri “- tha ajo.
Vitet e adoleshencës së Xheksonit e gjetën burimin e gëzimit tek përformancat e saj, edhe pse duke hedhur shikimin pas në kohë ajo sheh se në lojë ishin gjëra më të mëdha se aq.
“Lumturia erdhi kur njerëzit më kërkonin të përformoja … Por unë lumturohesha më shumë kur kënaqja të tjerët dhe jo veten.Një Janet më e rritur dhe më e mençur mund të thoshte, ‘lumturia e vërtetë është të dish se po bën gjithçka që mundesh …'”- shtoi më tej ylli i muzikës.
Pjesa më e madhe e trishtimit të saj erdhi kur ajo ishte në të 30-at , kur Jackson u përball me disa nga sfidat më të mëdha të shëndetit mendor.
“Këto ishin vite të vështira, kur unë luftova me depresionin.Lufta ishte e fortë. Mund ta analizoj burimin e depresionit tim. Vetëbesimi i ulët mund të jetë i rrënjosur në ndjenjat e fëmijërisë e të inferioritetit. Mund të lidhet me dështimin në përmbushjen e standardeve të panevojshme. Dhe sigurisht çështjet shoqërore të racizmit dhe seksizmit. Vendosini të gjitha së bashku dhe depresioni është një kusht i ngurtë dhe i frikshëm “- u shpreh Janet.
“Ashtu si miliona gra në botë, ende dëgjoja zëra brenda kokës sime që më rrihnin, zëra që më pyesin për vlerën time. Lumturia ishte e pakapshme. Një ribashkim me miqtë e vjetër mund të më bënte të lumtur. Një thirrje nga një koleg mund të më bënte të lumtur. Por për shkak se ndonjëherë shihja marrëdhëniet e mia të dështuara bija lehtë në dëshpërim”.
Ndërsa tani Jackson thotë se biri 17-muajsh Eissa Al Mana ka qenë një burim i gëzimit të vërtetë.
“Kulmi i lumturisë është kur mbaj djalin tim në krahë dhe e dëgjoj të gugasë, ose kur shikoj sytë e tij të buzëqeshur teksa i përgjigjet ndjeshmërisë time. Kur e puth. Kur i këndoj ninulla. Këto janë momentet më të shenjta dhe lumturia ime është kudo. Lumturia është mirënjohje ndaj Perëndisë … “- përfundoi Jackson.
