Më herët këtë javë ju njoftuam se Yll Limani ka ndërmend ta nis 2021 me vrull pasi një projekt i ri duket se është rrugës. Ishte menaxheri i tij ai që ka publikuar një video të këngëtarit në Instastory duke kënduar një pjesë nga projekti i ri. Ai i ka bërë tag Yllit dhe producentit dhe bashkëpunëtorit të tij të afërt, Fatjon Miftarit, duke shkruar “Të shtunën?”.
E shtuna erdhi e po ikën, por projekti i këngëtarit nuk u publikua. Nuk e dimë nëse ka patur ndonjë problem teknik, por artisti ka ndarë në rrjetet sociale një pjesë nga ky projekt.
Ai ka publikuar një video ku shihet duke udhëtuar me makinë e në sfond dëgjohet kënga e re, që qenka baladë. Ndonëse një sekuencë e shkurtër, fansat e këngëtarit janë dashuruar menjëherë me të, duke i kërkuar ta publikojnë sa më parë.
Sigurisht të gjithë duam muzikë të re sa më parë nga artisti dhe mezi po presim të shohim se çfarë ka gatuar.
Nga ana tjetër, kujtojmë se këngëtari ka bërë të ditur pak ditë më parë në rrjetet sociale se që tani e tutje do të jetë në menaxhimin e mikut të tij më të mirë, Bonart Ajvazi.
Më 26 dhjetor 2020 Yll Limani bashkoi forcat me një prej emrave më të suksesshëm të muzikës shqiptare për të sjellë një nga duetet më të bukura si një dhuratë për fundvit. “Mos shko” mban titullin kënga e tyre që është bërë menjëherë virale.
Teksti i këngës është shkruar nga Dafina dhe reperi Elinel, e është pjesë e albumit të këngëtares “Dafinë moj”. Dy këngëtarët janë kujdesur në çdo detaji për videoklipin, ku Dafina shfaqet si gjithnjë me look ekstravagant, kurse Ylli një simpatik i përhershëm.
