Pjesë e programit “Dua të të bëj të lumtur” këtë të shtunë ishin Nejlani dhe Rudina.
Dy të rinjtë të cilët kishin nisur historinë e tyre të dashurisë në vendin ku punonin që në moshën 17-vjeçare, kishin vendosur para pak kohësh që lidhjen e tyre ta kalonin në fazën tjetër, pra në fejesë.
Por, pas 4 vitesh, për shkak të xhelozisë së Nejlanit, një xhelozi e nxitur nga fjalët që i kishin thënë për Rudinën se ajo kishte lidhje me dikë tjetër, gjithçka u përmbys.
Rudina u shpreh se Nejlani luante bixhoz e konsumonte alkool. Pas situatave të vështira me skena xhelozie të vazhdueshme, Rudina kishte vendosur që të ndahej prej tij.
Nejlani në pendesë e sipër ka zgjedhur programin “Dua të të bëj të lumtur” për t’i kërkuar falje dhe për të nisur gjithçka nga e para.
Ndërkohë Rudina nuk pranoi që të rikthehej me të duke thënë: “Unë nuk kam nevojë për Nejlanin, do ta vazhdoj jetën time pa të!”
Pas largimit të saj, moderatorja Arbana Osmani u mundua ta ngushëllonte Nejlanin duke i thënë se përgjigja e Rudinës nuk dukej përfundimtare.
