Një ngjarje e rëndë ka ndodhur sot Greqi, pasi një grua shqiptare është e gjetur e vdekur në mes të rrugës në Menidi. Mediat greke bëjnë me dije se Enkelejda Danaj, 40-vjeç është goditur me thikë në bark, ndërsa pranë saj është gjetur një çantë. Eduart Danaj, bashkëshorti i saj është shpallur në kërkim.
Gruaja u gjet e pajetë në kryqëzimin e rrugëve Parnithos dhe Aristotelous, një nga pikat më qendrore të Menidit.
Trupi i pajetë është pikasur rreth orës 06:00 nga një banor i zonës dhe ka njoftuar policinë. Vlerësimi i parë i policisë që ka shkuar në vendngjarje është se bëhet fjalë për një vrasje nga partneri i saj, i cili e kanë lënë gruan në rrugë pas dhunës.
Sipas hetimeve paraprake rezulton se 40-vjeçarja gjatë javës së Pashkëve u ishte drejtuar autoriteteve dhe kishte denoncuar bashkëshortin e saj për dhunë në familje. Në vendngjarje ka qenë një dëshmitar kyç i rastit i cili pretendon se e ka parë gruan kur ajo u godit me thikë në mes të rrugës. Policia pritet të marrë deklaratë nga dëshmitari për të mbledhur më shumë informacione për rastin.
