Mesditën e së enjten në Mat, 51-vjeçari Kujtim Koxha, vrau me breshëri kallashnikolli tre punonjësit e bashkisë, si dhe la të plagosur një tjetër. Prej momentit kur ndodhi masakra në lokalin e fshatit, familjarët e 51-vjeçarit janë ngujuar brenda katër mureve të shtëpisë, pasi kanë frikë se të afërmit e viktimave mund të hakmerren, si dhe kanë turp të përballen me fqinjët.
“Ende nuk e besojmë dot atë që ndodhi. Nuk e besojmë, pasi njëri nga viktimat ka qenë shok i ngushtë i Kujtimit. E kemi fjalën për bashkëfshatarin tonë, Hamit Buçi. Kujtimi rrinte përditë me të, ishin shokë e miq. Pinin e hanin bashkë. Edhe atë ditë që ndodhi gjëma, bashkë kanë qenë e bashkë kanë pirë. Nuk kemi se çfarë themi. Nuk na dalin fjalët nga goja. Kujtimi na turpëroi me banorët e fshatit, me banorët e fshatrave të tjerë nga janë tre të tjerët, dy prej të cilëve mbetën të vrarë dhe një i plagosur. Na turpëroi në mbarë vendin. Këtë nuk ia kishim borxh”, – u shprehën familjarët e Kutim Koxhës për “Gazeta Shqiptare”.
Ata e kanë braktisur kryefamiljarin në “fatin” e tij dhe treguan se nuk do të jenë të pranishëm në gjyq, kur të caktohet masa e sigurisë për të.
“Na marrin të afërm e të njohur në telefon dhe nuk u përgjigjemi. Na vjen zor. Asnjëri nga ne familjarët nuk kemi shkuar për ta takuar që kur e arrestuan. Nuk kemi më punë me të. Edhe sikur të na falin familjarët e viktimave, ne nuk mund t’u dalim prej turpit para syve” – u shprehën familjarët.
Afër banesës së tyre nuk lëviz as miza, përveç policëve që ruajnë non stop banesën. Bashkë me të rriturit, në banesë janë ngujuar edhe fëmijët, të cilët prej ditës së masakrës nuk kanë shkuar më në shkollë. E ndërsa pjesëtarët e familjes Koxha kanë dënuar aktin e rëndë, vetë autori i krimit makabër nuk ka shprehur pendesë për marrjen e tri jetëve dhe lënien jetimë të fëmijëve të viktimave. Dy ditë më parë ai është justifikuar para oficerëve të policisë gjyqësore me fjalët se njëri nga viktimat e kishte fyer dhe e kishte qëlluar me shuplakë.
Burimi: Gazeta Shqiptare
