Vrasja në Laprakë, arrest me burg për 25-vjeçarin që “ndihmoi”autorin
25-vjeçari Roland Muzhaqi, i arrestuar si ndihmës i autorit të vrasjes së ndodhur në Laprakë mbrëmjen e të mërkurës ku gjeti vdekjen griselda Gjikola, është lënë në burg.
Gjykata Penale e Tiranës caktoi masën “arrest me burg”, të njëjtën masë që kishte kërkuar edhe Prokuroria e Tiranës, e cila tha se identifikimi i të dyshuarit është bërë bazuar në këqyrjen e kamerave të sigurisë në zonën ku u ekzekutua 17-veçarja Gjikola dhe u plagos partneri i saj Erjon Benga.
Objektiv i ngjarjes ka qenë pikërisht 23-vjeçari Benga ndërsa gjatë të shtënave, plumbat kanë goditur në kokë edhe adoleshenten e cila gjeti vdekjen në spital si pasojë e plagëve në kokë.
Para gjykatës, prokurori i çështjes është shprehur se shtetasi Roland Muzhaqi akuzohet si ndihmës, ndërsa në kërkim për akuzën e vrasjes, është shpallur shtetasi Robert P, 19 vjeç, që dyshohet të jetë autori i të shtënave me armë.
Sipas dëshmive të mbledhura nga grupi i hetimit, dyshohet se motiv i ngjarjes kanë qenë ngacmimet e autorit të shpallur tashmë në kërkim ndaj 17-vjeçares Briselda Gjokola.
Kjo e fundit prej disa javësh dilte me shtetasin Erjon Benga, i dënuar më parë, cili kur ka mësuar për ngacmimet ndaj partneres së tij është konfliktuar me shtetasin Robert P. Pikërisht për shkak të këtij konflikti, 19-vjeçari në kërkim ka organizuar sulmin me armë në zonën e Laprakës të mërkurën në mbrëmje.
Ai është filmuar nga kamerat e sigurisë të bizneseve të zonës, teksa afrohet tek automjeti i shtetasit Erjon Benga dhe qëllon disa herë me pistoletë.
Më pas autorët janë larguar me vrap nga vendi i krimit ndërsa 23-vjeçari i plagosur nga një plumb në shpatull ka dërguar në spital partneren e tij e cila nuk arriti të mbijetojë.
/Ora News
