Një atentat tronditi mbrëmjen e së martës qytetin e Durrësit. 39-vjeçari Edison Harizaj u ekzekutua me armë zjarri në një pritë, ndërsa njihet ndryshe edhe si krahu i djathtë i Emiljano Shullazit.
Viktima u vra teksa udhëtonte me makinën e tij tip “Audi”, bashkë me shokun Genci Caci, 33 vjeç, i cili mbeti i plagosur rëndë.
Ekzekutimi ndodhi në lagjen nr.13 të Durrësit, në një zonë pa ndriçim. Mendohet se atyre iu është bërë pritë me breshëri kallashnikovi, pasi ishin nisur nga Tirana, drejt Vlorës.
Pak pas ngjarjes, në zonën e Shën Vlashit në Durrës, është gjetur një makinë e djegur, e cila mendohet se i përket autorëve. Sakaq viktima Harizaj, rezulton person me precedentë penalë, ndërkohë që dyshohet të jetë i përfshirë në zhdukjen e Albano Xhaferrit, në Vlorë.
Ky i fundit është deklaruar i zhdukur qysh prej 18 qershorit, nga ajo ditë familjarët nuk kanë pasur asnjë kontakt me të. Ai prej pak kohësh ishte kthyer nga Belgjika drejt Vlorës, ku kishte thënë se kishte mall për dy fëmijët dhe gruan e tij.
Familjarët kanë thënë në polici, se Albano doli nga banesa pas një telefonate nga një i njohur i tij dhe se pikërisht ky i njohur e ka marrë të riun në makinë, për të mos e kthyer më mbrapsht.
Ndërkohë pak ditë pas Xhaferrit, është zhdukur në rrethana ende të paqarta edhe shoku i tij me të cilin ishin kthyer së bashku nga Belgjika, Ervis Troqe.
Burimi: Noa
