Një nga rastet më tronditëse të viteve të fundit në Zvicër ka marrë këtë të mërkurë përfundimin gjyqësor, pasi Gjykata Penale e kantonit Basel-Landschaft shpalli fajtor dhe dënoi me burgim të përjetshëm 44-vjeçarin M. R. për vrasjen e bashkëshortes së tij, K. J., ish-kandidate për “Miss Zvicra”.
Sipas vendimit të gjykatës, i pandehuri u shpall fajtor për vrasje dhe cenim të qetësisë së të vdekurit, ndërsa trupi gjykues e cilësoi ngjarjen si një akt ekstremisht brutal dhe çnjerëzor. Pretendimet e të akuzuarit për vetëmbrojtje u hodhën poshtë si të pabazuara.
Ngjarja e rëndë ka ndodhur më 13 shkurt 2024 në banesën e çiftit në Binningen. Hetimet dhe provat e paraqitura në gjykatë treguan se 44-vjeçari fillimisht e kishte sulmuar fizikisht bashkëshorten dhe më pas e kishte mbytur me një mjet, duke përjashtuar mundësinë e një veprimi të pavullnetshëm gjatë një përleshjeje.
Pas krimit, sipas dosjes hetimore, ai ka ndërmarrë veprime për të fshehur gjurmët. Në bodrumin e banesës, ai ka copëtuar trupin e viktimës dhe ka tentuar të zhdukë provat duke përdorur substanca kimike. Prokuroria e ka përshkruar këtë sjellje si të ftohtë, të planifikuar dhe pa shenja pendese.
Pavarësisht ngjarjes së rëndë, i pandehuri ka vijuar jetën e përditshme duke u përpjekur të mos ngjallë dyshime, përfshirë kontaktin me fëmijët e mitur dhe aktivitete normale jashtë shtëpisë.
Gjykata theksoi se rasti tejkalon çdo përfytyrim njerëzor dhe përbën një nga krimet më të rënda të trajtuara ndonjëherë në këtë kanton.
