Vdekja e Marigona Osmanit nga bashkëjetuesi, Dardan Krivaqa dhe një mik i tij, Arbër Sejdiu, tronditi gjithë opinionin publik në Kosovë e Shqipëri. Arbër Sejdiu, i arrestuar bashkë me Dardan Krivaqën nën dyshimet për vrasjen e vajzës, ka deklaruar se ajo ka bërtitur dhe para se t’i humbte ndjenjat, kishte vjellë. Deklaratën e tij e ka cituar avokati i familjes së 18-vjeçares së ndjerë, Gazmend Rexhepi.
Ky i fundit ka treguar se kanë ushtruar dhunë sistematike ndaj saj dhe se e kanë çuar në spital pasi ajo filloi të villte.
“Deklaratën e kam pa dje, ai ka thënë se vajza është rrahur në mënyrë sistematike pothuajse gati çdo ditë…Deklarimi i tij është që dy ditët e fundit Marigona ka përjetuar dhunë fizike. Arbri ka qenë në dhomën tjetër ku ka nejt Marigona, dmth partneri i saj Dardan Krivaqa, dy ditët e fundit standard i ka shkaktu dhunë fizike dhe psikike. Ka pas shumë piskama, qysh e ka citu ai, nga ana e Marigonës dhe dhunë fizike. Thotë kur kemi hy në dhomë ka pas vjellje dhe në atë moment e kemi marrë e kemi çu në spital”, tha Rexhepi.
Ai tha se janë në pritje të raportit të autopsisë, ndërsa certifikata e vdekjes i është dorëzuar familjes.
“Autopsia nuk është dorëzuar akoma, çertifikatën e vdekjes ia kanë dhënë familjes do të thotë që është konstatuar vdekja e saj. Dje kam qenë në prokurori, e kam dorëzu autorizimin, prokuroria ka thënë se akoma nuk e kanë marrë raportin e autopsisë. Vetëm konstatimi që ka dal në publik nga Ministria e Drejtësisë, që është thënë për politraumë dhe thyerje.
Prokuroria është në fazën e hetimeve na kanë thënë dhe na kanë premtu që për çdo shkresë do të njoftohet avokati dhe familja”, përfundoi ai.
