Ndërsa afrohet 45-vjetori i vrasjes së John Lennon, Mark David Chapman, njeriu që vrau ish-këngëtarin e Beatles në vitin 1980, është rikthyer në titujt e mediave pasi doli në dritë transkripti i seancës së tij të fundit dëgjimore në bordin e lirimit me kusht.
Në deklaratat e tij, vrasësi 70-vjeçar pranoi se e kreu krimin “për të qenë dikush”, një rrëfim që ka ngjallur indinjatë dhe trishtim tek fansat e muzikantit legjendar.
“Kjo ishte për mua dhe vetëm për mua, për fat të keq, dhe kjo ishte për shkak të popullaritetit të tij. Krimi im ishte plotësisht egoist”, tha Chapman, sipas transkriptit të siguruar nga New York Post.
Më 8 dhjetor 1980 , Chapman e qëlloi Lennon katër herë në shpinë jashtë ndërtesës Dakota në Upper West Side të Manhattanit, ku muzikanti jetonte me Yoko Onon . Po atë mëngjes, Chapman i kishte kërkuar Lennon të nënshkruante një kopje të albumit të tij të sapo publikuar “Double Fantasy”.
Pas vrasjes, Chapman qëndroi në vendngjarje duke lexuar “The Catcher in the Rye”, një libër që kishte ndikuar në obsesionin e tij me figurën e Holden Caulfield dhe, sipas tij, e kishte bërë ta konsideronte Lennon si një “mashtrues”.
Chapman shprehu keqardhje për dëmin e shkaktuar, por autoritetet e burgut arritën në përfundimin se atij i mungonte “sinqeriteti dhe empatia e konsiderueshme”. Prandaj, kërkesa e tij për lirim me kusht u refuzua për të 14-ën herë.
Duhet të mbahet mend se Chapman po vuan një dënim midis 20 viteve dhe burgim të përjetshëm në burgun Green Haven në Nju Jork, dhe mundësia e tij e radhës për të aplikuar për lirim me kusht do të jetë në vitin 2027.
