Dy kushërinjtë Mikel dhe Jani Jushi 35 dhe 30 vjeç, të cilët u qëlluan me armë zjarri mbrëmjen e të dielës në qendër të qytetit të Laçit, kanë ndërruar jetë në spitalin e Tiranës.
Sipas disa dëshmitarëve, dy viktimat kanë qenë në lokal dhe kanë debatuar dhe konfliktuar me autorët. Këta të fundit kanë patur edhe armë me vete. Autorët i kanë ndjekur për rreth 100 metra dy kushërinjtë Jushi, të cilët kanë tentuar të largohen dhe kanë qëlluar disa herë me pistoletë në drejtim të tyre.
Plumbat i kanë kapur disa herë në trup Mikel dhe Jani Jushin. Ata u transportuan në Tiranë për mjekim por si pasojë e plagëve të marra ndërruan jetë në spital.
Ndërkohë sot, janë identifikuar autorët e vrasjes së dy kushërinjve mbrëmë në Laç. Burime nga policia bëjnë me dije se kanë shpallur në kërkim dhe po punojnë për kapjen e shtetasve Markel Gjonbushi 25 vjeç dhe Vincens Pali (Bushi).
Dyshohet se autorët dhe viktimat kanë pasur konflikte të mëparshme e megjithatë vijojnë hetimet deri në zbardhjen e plotë të ngjarjes.
