Triumfi i Arilena Arës me këngën “Shaj”, shkruar nga Darko Dimitrov dhe Lindon Berisha në Festivalin e Këngës 2019 do të shoqërohej me një bujë mediatike. I shumëpërfolur mbeti votimi i jurisë lidhur me këngën që do të na përfaqësonte në Eurovision, veçanërisht ai i shkrimtares Rita Petro, e cila zgjodhi të votonte maksimalisht Arilenën.
E ftuar ditën e sotme në “E Diell”, Petro iu rikthye sërish çështjes në fjalë duke sqaruar gjithçka.
“Më pëlqen Elvana , është shumë energjike. Por, në atë rast, në atë festival ku gjykohet kënga, motivet e këngës së saj ngatërroheshin. Mund të mos jem specialiste, por kënga në fund të fundit është bërë për njerëzit e zakonshëm. Të them të drejtën edhe si muzikë, edhe si tekst nuk më bëri përshtypje. Ne po votonim për atë festival, nuk ishim duke votuar as për Arilenën as me Elvanën”.
Më tej, shkrimtarja shtoi se pas festivalit nuk ka pasur kontakte me asnjërën prej artisteve, sepse sipas saj janë pjesë e fushave krejt të ndryshme. Asokohe, në mesin e polemikave, Petro tha për “Wake Up” se kënga e Arilenës ishte më tepër në shijet e saj.
“Unë votova me pikët maksimale këngën e Arilena Arës, sepse ishte më shumë në shijet e mia ajo këngë. Sigurisht që jam ndjerë shumë e fyer nga hamendësimet që juria paska qenë e korruptuar. Ne të gjithë kemi shijuar këngët e Festivalit dhe në asnjë moment nuk është diskutuar as për njërën këngëtare dhe as për tjetrën. Emri i Elvana Gjatës nuk është diskutuar në asnjë moment mes anëtarëve të jurisë”.
