Një zyrtare e lartë nga Ministria e Arsimit në Kosovë thuhet se është pushur nga puna pasi dyshohet se është kapur duke vjedhur në një dyqan rrobash në një qendër tregtare në Bruksel. Ajo ndodhej bashkë me ministrin Shyqyri Bytyqi në kryeqendrën e Bashkimit Europian, për një vizitë zyrtare.
Sipas televizionit “7” thuhet se e perfolura është Igballe Cakaj, udhëheqëse e sektorit të trajnimeve në Ministrinë e Arsimit në Kosovë.
Ndërkohë në deklaratën e tij për mediat, ministri ka konfirmuar lajmin duke thënë se sapo e ka marrë vesh e ka pezulluar menjëherë nga detyra zyrtaren e shtetit.
Mediat kosovare shkruajnë se Igballe Cakaj pasi ishte futur të blinte rroba në një dyqan kishte paguar vetëm një pjesë, duke fshehur pjesën tjetër.
Por gjatë kësaj kohe ajo ishte vëzhguar nga kamerat e sigurisë dhe pasi ka tentuar të dalë nga dyqani, sigurimi e ka ndaluar për t’i marrë rrobat e vjedhura.Më pas ishte thirrur policia dhe pasi kishte dhënë deklaratën e saj ajo ishte liruar dhe i ishte bashkuar delegacionit.
Gjithashtu thuhet se për pak kohë delegacioni u alarmua pasi nuk e dinin ku ndodhej.
