Një familje me katër anëtarë, gjyshja 77 vjeç, babai 57 vjeç, mamaja 50 vjeç dhe djali 24-vjeçar kanë rezultuar pozitivë me koronavirus në Vlorë.
Lajmin e bën të ditur “Top Channel” nga DSHP, sipas të cilit këto janë rastet e para të konfirmuara në këtë qytet.
Katër anëtarët e familjes dyshohet se janë infektuar nga djali tjetër i tyre i cili me datë 6 mars ka ardhur nga Bergamo dhe pasi ka qëndruar një javë është nisur drejt Gjermanisë.
Më pas më datë 11 mars ata kanë pasur shqetësime dhe deri më sot nuk kanë pasur probleme serioze. Pasi kanë bërë tamponin ata kanë rezultuar pozitivë dhe janë nisur drejt Tiranës.
“Top Channel” bën me dije se pallati ku jetonte familja me iniciale P.S. është në qendër të qytetit të Vlorës mbi Postën Qëndrore.
Bashkia e Vlorës ka dezinfektuar sot zonën ku punonte dhe jetonte familja.
Po ashtu mësohet se kryefamiljari kishte para ambienteve të pallatit një njësi ambulante ku u shërbente qytetarëve dhe dyshohet të ketë pasur kontakte të shumta.
Në Shqipëri janë konfirmuar nga ministria 89 raste pozitive me koronavirus dhe 4 viktima.
Sot është shënuar viktima e katërt nga koronavirusi në vendin tonë, një 43-vjeçar nga Kavaja, vetëm pak orë pasi ndërroi jetë një i moshuar 71-vjeçar në spitalin e infektivit.
Një 66-vjeçar nga Lushnja, i cili prej ditësh ishte i shtruar në Spitalin Infektiv u nda nga jeta dhe një e moshuar 73-vjeçare nga Durrësi, e cila vuante nga një sërë sëmundjesh gjithashtu ka ndërruar jetë.
/Iconstyle.al
