Pasi në qershor të një viti më parë u shpall hapësira më e mirë publike në Evropë për vitin 2018, Sheshi “Skënderbej” po vlerësohet edhe njëherë tjetër për transformimin e tij.
Ai është përzgjedhur në mesin e 5 finalistëve për të garuar mbi çmimin për Arkitekturën Bashkëkohore/ Mies van der Rohe, që ka për qëllim të vlerësojë idetë e reja në fushën e arkitekturës.
Nga 383 nominime në total, në fillim juria përzgjodhi 40 dhe së fundmi vetëm 5 finalistë:
-PC Caritas në Melle, Gjermani;
-Sheshi “Skënderbej”;
-Tarracehouse, Berlin;
-Transformimi i 530 banesave, në Bordeaux, Francë;
-Plasencia Auditorium & Congress Centre, midis Seville dhe Salamanca, Spanjë.
Pritet që 5 veprat finaliste të vizitohen nga juria, ndërkohë vendi i parë do të shpallet në mesin e muajit prill.
Raportohet se ceremonia për dhënien e çmimit do të mbahet më 7 maj në Barcelonë. Vendi i parë fiton 60,000 euro, ndërsa arkitekti i projektit 20,000 euro.
