Avokatët e Princit Andrew sot dolën me arguemente për të hedhur poshtë padinë civile të Virginia Roberts Giuffre për ngacmime seksuale pasi u zbulua të hënën se shkelësi seksual i dënuar Jeffrey Epstein arriti një marrëveshje prej 500,000 dollarësh me Giuffre, në të cilën ajo pranoi të mos padiste asnjë “të pandehur të mundshëm”.
Në dokumentin e vitit 2009, i cili nuk përmend emrin e Princit Andrew, Giuffre pranoi të “lironte, shfajësonte, kënaqte dhe shkarkonte përgjithmonë” Epstein dhe “çdo person apo ent tjetër që mund të ishte përfshirë si i pandehur i mundshëm”.
Avokatët e djalit të mbretëreshës Elizabeth, 61 vjeç, thonë se marrëveshja do të thotë se ajo nuk mund ta padisë atë, por avokatët e Giuffre përgjigjen se kushtet e marrëveshjes në Florida janë të parëndësishme për rastin e saj kundër familjes mbretërore.
Seanca gjyqësore në New York, e kryesuar nga gjyqtari Lewis A. Kaplan, filloi të martën në mëngjes.
Pasi dëgjoi argumentet për një orë, gjyqtari Kaplan përfundoi seancën e telekonferencës dhe tha se do të merrte vendimin e tij nëse do ta mbyllte çështjen “shumë shpejt”.
Në një proces gjyqësor në vazhdim, Giuffre thotë se ajo u detyrua të bënte seks me Princin Andrew tre herë midis 1999 dhe 2002 në Londër, New York dhe në një ishull privat të Karaibeve në pronësi të Epstein. Andrew ka mohuar çdo gjë.
Në një deklaratë të mëparshme të ndarë me “PEOPLE”, Giuffre tha: “Unë po kërkoj llogari ndaj Princit Andrew për atë që më bëri mua. Të fuqishmit dhe të pasurit nuk përjashtohen nga mbajtja e përgjegjësisë për veprimet e tyre. Shpresoj që viktimat e tjera do të shohin se është është e mundur të mos jetosh në heshtje dhe frikë, por të rifitosh jetën duke folur dhe duke kërkuar drejtësi”.
Dy muaj pas vdekjes së Epstein, Andrew mori pjesë në një intervistë të “BBC-së” që synonte të sqaronte marrëdhëniet e tij me financierin Epstein dhe gjithashtu të adresonte akuzat e Giuffre.
Kur spikerja e “BBC Newsnight”, Emily Maitlis ngriti çështjen e një fotografie që tregonte Andrew me krahun e tij rreth belit të Giuffre – që mendohet se ishte bërë brenda shtëpisë në Londër të Ghislaine Maxwell më 10 mars 2001, kur Giuffre ishte 17 vjeç – Andrew pretendoi se ai nuk e mbante mend atë takim.
