Pak më parë në media u tha se një 59-vjeçar ka ndërruar jetë për shkak të koronavirusit.
Burri me iniciale M.S., ndërroi jetë mëngjesin e sotëm pasi ndodhej në terapi intensive në Spitalin e Shkodrës.
Por, pak më parë Ministria e Shëndetësisë ka sqaruar se personi që ka ndërruar jetë vdiq si pasojë e hemoragjisë cerebrale.
Ndonëse ai rezultoi pozitiv me COVID-19 ditën e djeshme, ministria njofton se ai nuk kishte simptoma.
Ministria e Shëndetësisë shkruan më tej se në Shkodër ka nisur një hetim epidemiologjik, pas konfirmimit të një infermiereje të spitalit rajonal Shkodër pozitiv në 24 orët e fundit, rasti i personelit shëndetësor i raportuar ditën e sotme.
“59-vjeçari, me inicialet M.S., nga Puka, ndodhej në gjendje kome në spitalin rajonal të Shkodrës, ka ndërruar jetë në spital, si pasojë e hemorragjisë cerebrale (aksident cerebral vascular) dhe jo si pasojë e COVID19, nga i cili ka rezultuar bartës ditën e djeshme, por pa simptoma të COVID19.
Ministria e Shëndetësisë informon se në Shkodër ka nisur një hetim epidemiologjik, pas konfirmimit të një infermiereje të spitalit rajonal Shkodër pozitiv në 24 orët e fundit (rasti i personelit shëndetësor i raportuar në deklaratën për media të ditës së sotme).
Sipas epidemiologëve dhe përfaqësuesve të Institutit të Shëndetit Publik që po kryejnë hetimin epidemiologjik në terren, dyshohet se ky rast është i lidhur me rastin e infermieres, e cila, sipas hetimit epidemiologjik, është infektuar në komunitet.
Nga rezultatet e testimeve të kryera në spitalin e Shkodrës, në 10 pacientë të shtruar që kanë qenë në kontakt me infermieren e infektuar, kanë rezultuar 4 pacientë të prekur, në gjendje të rëndë shëndetësore për shkak të patologjive për të cilat po trajtohen, por pa simptoma përsa i takon COVID19.
Njëri prej tyre, 59-vjeçari me inicialet M.S. ka ndërruar jetë, ndërsa tre pacientë të tjerë që janë bartës të COVID19 janë transferuar gjatë ditës së sotme në dy spitalet COVID”, thuhet në njoftimin e ministrisë
