Një fëmijë është nxjerrë i pa jetë nga rrënojat e një pallati në Thumanë, në rrethin e Krujës.
Vajza 10-vjeçare raportohet se ka humbur jetën në banesën e saj, ndërkohë që nëna e saj ndodhet nën rrënoja e plagosur.
Ndërkohë dy trupa të pajetë janë gjetur te vila Palma në Durrës, duke e rritur kështu bilancin tragjik të viktimave.
Lëkundjet e tërmetit janë të herëpashershme ndërkohë që puna për të t’iu ardhur në ndihmë njerëzve që kanë mbetur nën rrënoja, vijon. Lëkundja e fundit me magnitudë 5.4 u shënua në orën 08:30.
Drejtori i qendrës së koordinimit të emergjencave në një intervistë për Ora News, tha se situata është e rëndë, pasi ka ende persona nën rrënoja.
Sipas tij, 150 persona ndodhen në spitalin e Traunës në Tiranë.
“Ka ardhur duke u shtuar numri i pacientëve. Për fat të keq ka persona të tjerë nën rrënoja.
130-150 pacientë janë në spitalin e Traumës, dy janë në sallën e operimit dhe disa të tjerë po i cojmë në spitalet rajonale.
Kemi marrë masa, po menaxhohet me këto forca”, tha drejtori.
Policia e Shtetit u kërkon gjithë qytetarëve të kufizojnë në maksimum lëvizjet me automjetet e tyre, për t’u dhënë mundësi autoriteteve dhe shërbimeve të emergjencave civile të qarkullojnë lirshëm në rrugë.
