Një tjetër rast abuzimi me minorene është shënuar në vendin tonë, më saktë në Malësinë e Madhe, aty ku një efektiv policie ka ngacmuar seksualisht një vajzë 15-vjeçare.
Nëna ka denoncuar rastin për newsbomb.al dhe ka rrëfyer gjithë tmerrin e përjetuar, pasi ka parë një video ku efektivi shfaqej i zhveshur nga mesi e poshtë dhe kryente veprime të turpshme.
Ajo akuzon shefin e policisë së zonës Grumiere (Malësi e Madhe), B. Bajrakurti, duke deklaruar se e ka marrë në makinë vajzën, e ka telefonuar e madje ka kryer akte të turpshme në bisedat me të në telefon.
E ëma pohon se pasi ka parë pamjet e turpshme, dhe ka folur me vajzën, ka marrë videot e bashkë me të bijën ka shkuar në komisariatin e Koplikut për ta denoncuar por aty askush nuk e ka pritur.
Ajo më pas është drejtuar për në komisariatin e Shkodrës, ku ka kërkuar të takojë shefin, por askush nuk u doli në takim. Gruaja madje shprehet se i kanë thënë të mos merren me malësorë pasi janë “të paprekshëm”.
Menjëherë pas denoncimit, shefi i policisë i cili është i martuar dhe me fëmijë, është vënë në pranga nga policia e Shkodrës pasi akuzohet për ngacmim seksual të 15-vjeçares.
Për shkak të pamjeve të rënda dhe mjaft shqetësuese, “Iconstyle.al” refuzon të publikojë video-skandalin!
Denoncimi i nënës së vajzës:
“Jam prind i një vajze 15 vjeçare nga Malësia e Madhe, fshati Gruemiere. Dua të denoncoj këtë shtet të kapur nga perversiteti e imoraliteti që po na detyron të ikim nga ky vend, marrë shkas nga ngjarjet e fundit që kanë ndodhur, ku janë përdhunuar vajza minorene. Atë fat e ka patur dhe vajza ime duke u ngacmuar nga shefi i policisë së zonës Gruemiere shetetasi Berhan Bajrakurti. Para 4 ditësh me vjen vajza nga shkolla e shqetësuar, e pyeta se çfarë kishte. Ajo pati frikë të më rrëfente.
Pas disa orësh arriti të më tregoje se kishte dalë para ky njeri duke e ngacmuar dhe duke i thënë hajde hyp në makinë me mua të bej xhiro me makinë. E kishte ndjekur vajzën deri në afërsi të shtëpisë. Nuk ishte hera e parë që e përndiqte pasi këtë gjë e ka bërë edhe nëpërmjet telefonit duke i telefonuar vajzën duke i dalë nudo dhe duke kryer veprime të ndyra. Vajza e kishte filmuar këtë person, me të marr filmimet me vajzën, i drejtohem komisariatit Koplik. Me të shku tek dera na erdhi për 5 minuta pasi mbërritëm, personi në fjalë, pra punonjësi i policisë Berhani. Më kapi për krahu, më nxori veçmas duke më bërë presion se do të zhduk, do ju shfaros”, rrëfen nëna e vajzës për newsbomb.al.
“Të gjendur para kësaj situate ku asnjë punonjës nuk na dilte në krah as për të na pyetur për çfarë keni ardhur, u larguam. Te nesërmen vajtëm tek drejtoria e policisë Shkodër, kërkuam shefin më të madh të policisë Shkodër të takonim por nuk na u mundësua ai takim, pasi vetë kupola e Shkodrës e policisë ishte nga Malësia e Madhe. Na thanë që mos u merrni me malësorë se janë të paprekshëm”, vazhdon më tej rrëfimin nëna ndërsa thekson se pas kësaj do largohen nga zona ose nga Shqipëria.
