Kanë kaluar dy ditë nga publikimi i videos intime të inspektorit të policisë së Gruemirës, Berhan Bajrakurti, dhe ende nuk dihet se kush e ka bërë denoncimin.
Kjo pikë kyçe ka rëndësi për vijimin e hetimeve, pasi në mungesë të viktimës ose denoncuesit, videoja intime nuk e ngarkon policin me asnjë përgjegjësi penale raporton “Klan tv”.
Bajrakurti është vënë në pranga prej dy ditësh me akuzën e ngacmimit seksual ndaj një 15-vjeçareje. Por deri tani, askush nuk i është drejtuar policisë për të marrë përsipër akuzat dhe për të zyrtarizuar denoncimin.
Kjo ka bërë që të rriten dyshime se mund të bëhet fjalë për një lajm të rremë, apo siç njihet me termin “Fake News”.
Hetuesit nuk përjashtojnë që komunikimi në rrjetet sociale i Bajrakurtit të ketë qenë me persona të rritur, të cilët më pas e kanë shfrytëzuar filmimin për të dëmtuar imazhin e inspektorit të policisë.
Policia ka marrë deri tani në pyetje mësues, prindër dhe nxënës të shkollës së mesme të Gruemirës dhe asnjëri nuk ka patur dijeni për ngacmim të ndonjë nxënëseje.
Ekspertët i janë drejtuar edhe Facebook-ut për të parë se me kë ka komunikuar ai dhe kujt ia ka dërguar videon, por Bajrakurti ka fshirë çdo komunikim në telefon, pas daljes së historisë në media.
Përfaqësues të portalit që publikoi videon kanë sqaruar se e kanë marrë atë nga një email anonim.
/Tv Klan
