Një situatë alarmante është krijuar në pikën kufitare të Kakavijës, ku radha e automjeteve për të kaluar kufirin ka arritur deri në Jorgucat, gati 20 kilometra.
Fëmijë, gra, të moshuar e të sëmurë, e kanë kaluar natën jashtë, pasi gjatë natës dogana nuk punon, pas rregullit të ri të qeverisë greke për të luftuar koronavirusin.
Në datën 16 gusht në Greqi hyn në fuqi vendimi se çdo person që hyn në vend duhet të karantinohet 7 ditë dhe qytetarët duan të shkojnë përpara kësaj date. Ata shprehen se nuk u ka shkuar asnjë për tu shpjeguar situatën, dhe se janë në mëshirë të fatit.
“Qindra shqiptare presin në radhë kilometrike në Kakavijë, pa asnjë informacion apo orientim! Kjo qeveri shfaqet sërish indiferente dhe totalisht e papërgjegjshme ndaj problemeve të qytetarëve dhe mbështetjes kundrejt tyre. Ky është “kujdesi” që kjo qeveri tregon për qytetarët e saj”, shkruan një nga qytetarët në Facebook ku publikon edhe videon.
Në një video me dron të realizuar nga Dosja.al shihet qartë situata dhe radha e makinave. Dhjetëra qytetarë kanë nisur rrugëtimin në këmbë me çanta në krahë, pasi shprehen se kështu mund të arrijnë më herët në Greqi.
Autoritetet greke kanë marrë masa me qëllim parandalimin e përhapjes së COVID-19, duke kërkuar tamponin ndërsa vonesa ka krijuar edhe mbyllja e pikës kufitare gjatë natës.
Pikat e kalimit në kufirin Kakavijë dhe në Kapshticë do të jenë të mbyllura nga pala greke për udhëtarët dhe automjetet si në hyrje edhe në dalje të Greqisë gjatë fashës së orarit 22:00-06:00, deri në një njoftim të dytë.
