Një nënë e re në vendin tonë ka sjellë në jetë fëmijën e saj, gjatë kohës që ishte e infektuar me Covid-19 dhe ishte shtruar në reanimacion.
Së bashku me të bijën e sapolindur, ajo ka arritur t’i shpëtojë komplikacioneve për shkak të virusit dhe është takuar për herë të parë me foshnjën e saj.
Ministrja e shëndetësisë, Ogerta Manastirliu, ka ndarë momentin emocionues kur nëna takon e përlotur të bijën për herë të parë, teksa shkruan krahas videos:
“Edhe kur jeta për nënën e re dhe foshnjen e saj, varej në një fije të hollë shprese, Fabiola dhe Najla luftuan deri në fund dhe e fituan përballjen e vështirë me Covid-19. Pas ndërhyrjes delikate të ekipit të maternitetit “Mbretëresha Geraldinë” dhe QSUT, ditëve të vështira në terapinë intensive, ky është momenti magjik, me emocion të papërshkrueshëm, kur Fabiola sheh për herë të parë foshnjen e saj”, ka shkruar Manastirliu.
“Ishte një sfidë shumë e madhe si për mua dhe vajzën. Ishte një neglizhencë nga ana ime. Nuk është së i vura shumë rëndësi simptomave të para. Kam ardhur me urgjencë të materniteti dhe më pas të Infektivi. Pastaj kam qenë në reanimacion. Kam bërë lindjen në mënyrë urgjente nga stafi i maternitetit që më ka ardhur te kirurgjia, Të gjithë personelin e kam pasur në dispozicion. Falenderoj stafin mjekësor pasi falë tyre jam këtu ku jam sot”, tregon nëna e re.
