Një incident i pazakontë ndodhi ditën e djeshme në Madrid, ku ish-presidenti i Federatës Spanjolle të Futbollit (RFEF), Luis Rubiales, u godit me vezë dhe domate gjatë prezantimit të librit të tij të ri. Ngjarja shkaktoi tronditje të madhe tek të pranishmit, sidomos kur u zbulua se agresori ishte vetë xhaxhai i Rubiales.
Rubiales, i cili është dënuar për sulm seksual ndaj futbollistes spanjolle Jenni Hermoso pas puthjes së papritur në buzë gjatë festimeve të Kupës së Botës për Femra kishte muaj të tërë që nuk shfaqej në publik. Dalja e tij e parë para mediave dhe publikut u kthye në një skenë kaotike.
Sipas portalit Periodista Digital, Rubiales konfirmoi identitetin e agresorit dhe tregoi se kishte dyshuar fillimisht për një kërcënim më serioz:
“Kam zbuluar se ai ishte xhaxhai im, quhet Luis Ruben,” tha ai.
“Më hodhi vezë sepse është një person i çmendur dhe nuk mendoj se ka ndonjë justifikim për këtë. E arrestuan menjëherë, e larguan nga salla dhe do të duhet të ndërmarrim veprime ligjore, sepse sinqerisht mendova se ishte i armatosur.”
Incidenti ngjalli shumë reagime në Spanjë, duke rikthyer sërish në qendër të vëmendjes figurën e Rubiales, i cili prej muajsh ka qenë në qendër të kritikave dhe polemikave për sjelljen e tij në finalen e Botërorit të Femrave.
Autoritetet konfirmuan se agresori u arrestua menjëherë pas incidentit, ndërsa pritet që hetimet të vijojnë për të zbardhur motivet që qëndrojnë pas sulmit — pavarësisht se lidhja familjare e bën ngjarjen edhe më të pazakontë.
