Hedhja e 65-vjeçarit të infektuar me Covid disa ditë më parë nga spitali ‘Shefqet Ndroqi’ në Tiranë (KLIKO) shkaktoi një tjetër tronditje të opinionit, pasi ishte pacienti i dytë që vetëvritej brenda pak javësh pas rastit të 29-vjeçarit nga Durrësi në muajin gusht. (KLIKO)
Por për çfarë ndodh një gjë e tillë, çfarë masash duhet të merren dhe cila është zgjidhja? Ekspertë të ndryshëm japin përgjigje të ndryshme, dhe një prej tyre është vendosja e psikologëve dhe punonjësve socialë në spitalet Covid. Sipas psikologëve pacientët kanë nevojë që të dëgjohen, dhe është e domosdoshme që t’u lejohen telefonat. (KLIKO)
Së fundmi, rreth kësaj çështjeje ka folur edhe një prej të shëruarve nga Covid-19, duke na njohur më mirë me atë çka ndodh brenda murve të spitaleve.
Pal Prekperaj, 66 vjeçari me profesion avokat, 10 ditë pasi ka lënë spitalin tashmë i negativizuar, ka rrëfyer në një intervistë për “News 24” se në spitalin e Sanatoriumit mbërriti më shumë i vdekur se i gjallë.
Avokati kujton 10 ditët e para në spital, duke thënë se shërbimi mjekësor dhe infermieror nuk i ka munguar në asnjë rast , por shton se sipas tij personeli është i mbingarkuar dhe i lodhur deri në atë pikë sa e ka të pamundur të ofrojë të gjithë asistencën sipas nevojës.
I mbijetuari nga Covid-19 kujton shokët e dhomës ku pacienti në gjendje më të mirë i shërbente më të pamundurit.
Ai ka treguar se aktet e vetëvrasjeve nuk janë produkt i mosdhënies së shërbimit mjekësor, por se sipas tij pacientët ngarkohen psikologjikisht që para se të shkelin në spital duke refuzuar që në fillim maskën e oksigjenit që u duket se i mbyt dhe asfikson.
64-vjeçari thotë se vetëvrasjet nuk parandolohen me zgara hekuri në dritare dhe as me policë në dhoma duke rikthyer në vëmendje punën e munguar të psikologut në spitale.
Ministria e Shëndetësis ende në heshtje
Sipas asaj që kanë thënë edhe psikologët këto ditë duhet staf në spital që t’i asistojnë të paktën për të racionalizuar mendimet e personave të shtruar. Pacientët kanë nevojë për staf mbështetës, psikolog, pse jo edhe punonjës social, në mënyrë që të ndjehen të dëgjuar për dhimbjen e tyre, të qetësuar dhe më pas një profesionist tu shpjegojë ecurinë jashtë fantazisë së tyre që arrin në ekstrem.
Pavarësisht ngritjes së alarmit dhe dy vetëvrasjeve nuk kemi ende një reagim nga Ministria e Shëndetësisë lidhur me zgjidhjen e propozuar nga psikologët.
Mungesa e bluzave të bardha
Prej kohës iconstyle.al ka ngritur shqetësimin se vendit tonë i mungojnë bluzat e bardha, duke krijuar pasiguri të mëdha mbi përballimin e pandemisë në vijim. (KLIKO) Kanë qenë vetë mjekë të njohur që kanë deklaruar se spitalet nuk kanë burime njerëzore dhe për këtë arsye nuk po hapen COVID3 dhe COVID4. Sipas denoncimeve të tyre edhe spitalet COVID 1 dhe 2 po funksionojnë me personel mjekësor që tashmë është sfilitur nga puna e lodhshme dhe po mundohet shumë t’i shkojë deri në fund kësaj beteje.
Në fakt, të gjithë jemi të vetëdijshëm se sistemi shëndetësor publik vuan nga numri i pamjaftueshëm i profesionistëve. Krahas mungesës së financimeve, mësohet se shkak për këto zhvillime është bërë edhe emigracioni i lartë i trupës shëndetësore jashtë vendit, sipas një analize të Ministrisë së Shëndetësisë. Sipas të dhënave nga Observatori Global i Shëndetit, Shqipëria ka numrin më të ulët të mjekëve për banorë në rajon. Greqia ka 6.2 mjekë për 1000 banorë, Maqedonia 2.8, Mali i Zi 2.3, Serbia 2.4 dhe Bosnja 1.8 mjekë për 1000 banorë.
Aktualisht janë 1.2 mjekë për 1000 banorë dhe raporti mami/infermierë është 3.6 për 1000 banorë, teksa edhe këto burime të pakta njerëzore në shëndetësi janë shpërndarë në mënyrë të pabarabartë. Indeksi i Europian Shëndetit (EHCI) për vitin 2018 vuri në dukje se Shqipëria ka burime shumë të kufizuara të kujdesit shëndetësor, duke theksuar se vuan nga një strukturë shëndetësore e vjetruar, me një raport të lartë dhe të kushtueshëm të kujdesit në pacient për kujdesin jashtë-pacientit, thuhen në vlerësim.
Sakaq, fakti që një pjesë e madhe e personelit mjekësor u infektua nga Covid-19 (zyrtarisht nuk kemi një numër) duket se e ka bërë të vështirë menaxhimin e situatës. Burime të sigurta pranë Infektivit kanë treguar për iconstyle.al se mjekë e infermierë, jo të fushës, janë detyruar nga instancat përkatëse për tu bërë pjesë e stafit të shërbimit infektiv, madje burimet shtojnë se janë kërcënuar edhe me heqje të licensës së infermierit.
E ardhmja e pasigurtë…
Mjekët, infermierët por edhe të gjithë operatorët e tjerë sanitarë janë rikthyer si asnjëherë më parë në qendër të vëmendjes së politik-bërjes dhe të publikut kudo në botë, si pasojë e shpërthimit të pandemisë globale. Mirëpo, edhe në këtë periudhë kaq të rëndësishme, qeveria shqiptare duket mos ta ketë kuptuar vendin e tyre, por vijon të ndjekë interesat e veta dhe preferencën e saj për të dërguar paratë e taksapaguesve në tendera korruptiv. (Lexo këtu)
Qeveria vijon të lartësojë rëndësinë e veprave publike me një retorikë të bukur që do ta kishte zili edhe Aristoteli. Por, do ishte mirë që të ndiqte edhe parimin e nevojave dhe balancimit të tyre në shpërndarjen e të ardhurave, pasi interesat personale e kanë verbuar shikimin për rritjen e rrogave të bluzave të bardha (në rastin konkret) kur kemi më shumë nevojë për ta. Vjeshta erdhi dhe parashikimet e ekspertëve janë për një valë të dytë që do jetë më e fortë se e para. Kur Shqipëria ka këtë bilanc në verë, çfarë pritet të ndodhë në muajit në vijim dhe si do e përballojmë këtë krizë shëndetësore?
