Në muajin janar të këtij viti, vogëlushi i Fatma Methasanit dhe Alfio Rrotanit, Noah, mbushi 1 vit nga ardhja në jetë.
Padyshim, ky ka qenë viti më i bukur për çiftin, jeta e të cilëve ka ndryshuar totalisht. Noah është kthyer në çapkënin e shtëpisë, që kthen përmbys gjithçka dhe s’lë gjë pa prekur me dorë.
Fatma është detyruar të heqë çdo zbukurim në shtëpi, të gjitha enët e makinës i ka në kuzhinë, nuk mban asnjë bizhuteri sepse ia këput Noah, i cili është gjithashtu “stilisti” i flokëve të saj.
I vogli i ka prishur mami Fatmës të gjitha palët e syzeve dhe nuk dëshiron ta mbajë dikush për dore kur ecën. Pra, një çapkën i vërtetë që ka futur në halle moderatoren, siç ajo e tregon edhe vetë.
E ftuar më herët në emisionin “E ardhmja është vajzë”, ajo tregoi se shtatzënia me Noah e gjeti të papërgatitur, sepse nuk ishte e planifikuar. Moderatorja tha se u gëzua shumë nga ky lajm, por ju shkatërrua gjithë përditshmëria e saj, që vërtitej rreth punës.
Më pas ajo rrëfeu për herë të parë se periudhën pas lindjes e ka përjetuar shumë keq dhe se këtë gjë e kanë ditur shumë pak njerëz.
“Shumë pak e dinë që unë e kam kaluar shumë keq periudhën e paslindjes. Kam qenë e rrethuar me njerëz që e donin shumë Noahn dhe mua, por po më ndryshonte jeta në një mënyrë të çuditshme. Unë takohesha më parë me Alfion në orën 11 të natës në shtëpi, më pas aktiviteti më i interesant i ditës sime ishte të dilja në ballkon që të ndryshoja rrobat e të voglit.
Ky ndryshimi drastik i jetës më bëri ta kaloja shumë keq. Ato kilogramët e tepërt, goca më besoni që mund t’i humbni shumë shpejt, janë shumë të parëndësishme. Por, unë në atë periudhë e kam kaluar më keq seç duhet dhe nuk ia fal vetes akoma që nuk e kam shijuar sa duhet periudhën e paslindjes sepse mendoja gjëra të parëndësishme”, rrëfeu Fatma.
Më pas ajo dha një mesazh me vlerë për të gjitha nënat.
“Gjej hapësirën t’ju them mamave që mund të jenë pa gjumë, që jeta e re që po ju duket e çuditshme, më vonë do ta kuptoni se kjo është gjëja më e bukur që po bëni në këtë botë”, tha Fatma Methasani.
