Shfaqja e pandemisë Covid-19 lindi nevojën e zhvillimit të procesit mësimor përmes rrugës virtuale. Shqipëria zgjodhi mësimin e alternuar për arsimin parauniversitar, një zgjedhje e shoqëruar nga disa problematika.
Familje që nuk arrijnë t’u sigurojnë fëmijëve internet apo një hapësirë të veçuar në shtëpi, prindër që duhet të shkojnë në punë dhe t’i lënë ata vetëm, vështirësi në përthithjen e dijeve apo lufta me shpërqëndrimin, si pasojë e të mësuarit nga shtëpia.
Përpos këtyre vështirësive është e rëndësishme jo pak të ndalemi në ndikimin që e gjitha kjo sjell te nxënësit, te produktiviteti i tyre. Si ta ndihmoni ju si prindër fëmijën tuaj për të përftuar sa më shumë nga mësimnxënia online.
Përpiquni sa të mundeni të vendosni orare
Fëmija duhet të ketë një ide më të qartë sa i takon menaxhimit të ditës; një orar për fjetjen, mësimin online apo argëtimet e ndryshme. Përdorni një kalendar të veçantë, që pret të ngjyroset çdo ditë, kur detyrat kanë mbaruar me sukses.
Qetësia është çelësi
Pavarësisht se sa e vështirë mund të jetë diçka e tillë, nëse fëmija nuk gëzon dhomën e tij, tentoni t’i krijoni një kënd të rehatshëm, pa zhurma dhe frymëzues. Letrat e murit dhe vizatimet shumëngjyrëshe janë një ide e mirë.
Vëzhgojini
Është tepër e rëndësishme që ju si prindër të jeni gjatë gjithë kohës në dijeni se çfarë po bën fëmija juaj gjatë kohës së mësimit online. Mos i qëndroni shumë pranë, ruani pak distancë. Gjatë ditës, fare miqësisht pyeteni se ç’gjë interesante mësoi sot.
Mësoni duke u argëtuar
Ju mund të ndikoni për mirë në performancën arsimore të fëmijës. Konsumoni një vakt të shijshëm në kuzhinë, apo një filxhan kakao ndërkohë që ai/ajo shkruan esenë e ditës. Tjetër ide? Një show magjik ku mësohet rreth shkencës.
Lëvizni sa më shumë
Kërceni apo shëtisni së bashku; mbajeni fëmijën tuaj energjik. Në fund të ditës mos harroni se e gjitha kjo situatë është e vështirë për fëmijën. Muzikë, filma apo pikturë; pak art është gjithmonë ndihmues.
