Ndoshta nuk i përballoni dot në çmim veshjet “Gucci”, por një darkë edhe mundeni! Kompanitë luksoze të modës janë mësuar të joshin fashionistat dhe tani po zgjerohen nga “haute couture” tek “haute cuisine”.
“Gucci Garden” është restoranti më i ri i markës në Firence, të Italisë. Në restorantin me 50 vende, klientët do të kenë mundësinë të shijojnë gatimet e shefit Masimo Bottura, i vlerësuar me 3 yje Michelin.
Ai pozicionohet pas mureve të godinës së shekullit të 14, Palazzo della Mercanzia, pranë sheshit më të famshëm të qytetit, Piazza della Signoria. Vizitorët mund të provojnë atje tortelini me Parmigiano Reggiano, rizoto me kërpudha e specialitete të tjera që variojnë nga 20 deri në 30 euro pjata.
Shtëpia italiane e modës në pronësi të Kering, nuk është e vetmja kompani luksoze që ka kthyer vëmendjen nga ushqimi. Ralph Lauren, Versace, Giorgio Armani dhe lokali i fundit Tiffany & Co., “Blue Box Café”, kanë ndjekur këtë praktikë.
Siç pohojnë ekspertët e industrisë, firmat e mëdha po shkojnë pikërisht aty ku shpenzohen paratë e klientëve të pasur. “Gucci” dhe rivalët e tij nuk presin që këto investime të prodhojnë të ardhura të rëndësishme financiare për momentin, por ato shihen si një mënyrë për zgjerimin e tyre global.
Burimi: Harper’s Bazaar
