Tre pacientë të spitalit Infektiv, të konfirmuar me koronavirus po trajtohen në spitalin “Shefqet Ndroqi”, i njohur ndryshe si Sanatoriumi, ku kanë mbërritur 5 respiratorët e rinj.
Lajmin e ka bërë të ditur ministrja e Shëndetësisë, Ogerta Manastirliu në një postim në Facebook, e cila thotë se ky spital ka forcuar kapacitetet.
Aktualisht në shërbimin infektiv janë 81 të shtruar. 8 prej tyre janë në terapi intensive ndërsa 4 nga këta janë të intubuar.
Pesë respiratorët e parë, janë pjesë e financimit të qeverisë shqiptare prej 54 respiratorësh të rinj dhe më pas edhe 50 të tjerë, që do të forcojnë kapacitetet për terapinë intensive në përballjen me COVID-19.
Deri tani në Shqipëri janë testuar 1919 raste të dyshuara dhe prej tyre janë të konfirmuar pozitivë me COVID-19, 277 raste, nga të cilët vetëm 8 janë femijë.
Ndërsa numri i viktimave ka shkuar në 16.
