Edhe bizneset e vogla që kanë pasur të hapur aktivitetin e tyre, por për shkak të COVID-19 po vuajnë pasojat negative në ekonomi, nuk do të paguajnë qiranë për dy muaj.
Sipas një ndryshimi në aktin normativ në lidhje me qiratë, të miratuar nga qeveria, pagimi i qirave do të shtyhet për dy muaj, prill dhe maj për bizneset e vogla që nuk janë mbyllur.
Report.tv bën me dije se qiraja do të shtyhet për t’u paguar me këste apo në mënyrë proporcionale dhe të dakordësuar me qiradhënësin, pas muajit maj 2020.
Për ato kontrata që përfundojnë përpara afatit 31 maj 2020, detyrimi i prapambetur do të paguhet nga qiramarrësi brenda tre muajve pas datës 31 maj 2020.
“Të gjithë qiramarrësit, persona fizikë/juridikë, me të ardhura deri në 14 000 000 (katërmbëdhjetë milionë) lekë në vit, të cilët kanë kontratë noteriale qiraje për zhvillimin e aktivitetit të tyre ekonomik, të nënshkruar përpara shpalljes së gjendjes së epidemisë, pavarësisht nëse e kanë të lejuar apo të ndaluar aktivitetin si pasojë e gjendjes së shkaktuar nga COVID–19, nuk do ta paguajnë detyrimin e qirasë për dy muaj, prill dhe maj 2020″, shkruhet në aktin normativ të ndryshuar.
