Prej shumë vitesh, Gjermania është konsideruar vendi që përqafon më shumë nudizmin në publik, falë traditës së saj historike Freikörperkultur (FKK). Por një studim i ri i YouGov, i kryer në gjashtë vende të Evropës Perëndimore, ka zbuluar se Danimarka është sot vendi ku lakuriqësia pranohet dhe praktikohet më shumë se kudo tjetër.
Sondazhi u zhvillua në Danimarkë, Gjermani, Spanjë, Francë, Itali dhe Mbretërinë e Bashkuar, duke analizuar se si shihet zhveshja në ambiente publike dhe private. Rezultatet treguan se danezët janë më të hapurit dhe më të natyrshmit ndaj nudizmit, jo vetëm si ide, por edhe në praktikë.
Zhveshja në plazhe dhe hapësira private
Shumica e europianëve pajtohen se zhveshja në plazhe nudiste të organizuara është diçka normale. Por diferencat shfaqen në hapësirat e përditshme:
-35% e danezëve e konsiderojnë të pranueshme zhveshjen edhe në plazhe të zakonshme, jo nudiste.
-87% thonë se është krejtësisht normale të jesh lakuriq në kopshtin e shtëpisë.
Në vendet e tjera këto shifra janë dukshëm më të ulëta.
Sipas studimit, në Danimarkë 64% e të rriturve e konsiderojnë larjen lakuriq si krejtësisht të zakonshme.
Në Gjermani këtë e pranojnë rreth 49%, në Spanjë 44%, në Mbretërinë e Bashkuar 32%, në Francë 31%, ndërsa në Itali vetëm 25%. Pra, Danimarka del qartë shteti më tolerant dhe më i relaksuar ndaj nudizmit spontan në natyrë.
Nga teoria në praktikë
Më shumë se gjysma e danezëve pranojnë se të paktën një herë gjatë jetës si të rritur janë shfaqur lakuriq në publik.
Në Gjermani dhe Spanjë, kjo përqindje bie rreth 45%, në Francë 31%, në Britani 25%, ndërsa në Itali vetëm 22%.
Kjo tregon se në Danimarkë nudizmi nuk është vetëm “i pranueshëm” në teori — por edhe realisht i praktikuar.
Megjithatë, Gjermania vazhdon të kryesojë në numrin e plazheve dhe kampeve nudiste të organizuara, falë trashëgimisë së saj kulturore FKK, edhe pse popullariteti ka shfaqur një rënie të lehtë vitet e fundit.
