Lista e re e vendeve më të rrezikuara nga Covid-19 është hartuar nga Instituti “Robert Koch”.
Nga kjo listë prej ditës së sotme janë hequr Kosova, Iraku, Hondurasi dhe Kenia. Ndërsa si vende të rrezikuara janë shpallur Kroacia, Bullgaria, Kameruni, Kongo dhe Singapori.
Në këtë mënyrë udhëtarët që nisen nga Kosova për Gjermani nuk kanë më nevojë për teste dhe karantinim. Teste duhet të kenë vetëm udhëtarët me avion, të cilët nuk janë vaksinuar apo shëruar nga Covid-19 në gjashtë muajt e fundit.
Shqipëria, Maqedonia e Veriut, Mali i Zi dhe Serbia edhe më tej mbeten në listën e vendeve të rrezikuara, për shkak të shifrave më të larta të infektimeve me Covid-19.
Udhëtarët nga këto vende duhet të kenë një test me vete (nëse nuk janë vaksinuar apo shëruar nga Covid-19 në gjashtë muajt e fundit), ndërsa ata që nuk janë vaksinuar apo shëruar do të duhet të karantinohen 10 ditë në Gjermani.
Kujtojmë se dje në Shqipëri janë regjistruar 629 raste positive me Covid-19. Shtatë qytetarë nuk kanë mundur ta fitojnë betejën me virusin, ndërsa në spitalet COVID po marrin trajtim 153 pacientë, nga të cilët 19 janë në gjendje më të rënduar.
Janë shëruar 441 qytetarë gjatë 24 orëve të fundit, duke e çuar numrin e të shëruarve në 171,475 që nga fillimi i epidemisë.
