Në fillim të muajit maj një burim zbuloi për “iconstyle.al” surprizën e natës finale të spektaklit “Dancing With the Stars”: ardhjen e aktorit të njohur turk, Tolgahan Sayisman. Ditën e sotme ai shkeli në tokën shqiptare për herë të parë, i shoqëruar nga bashkëshortja e tij, Almeda Abazi.
“Iconstyle.al” ndodhej në aeroport për të takuar nga afër aktorin, i cili u shpreh për median tonë:
“Vij për herë të parë në vendin ku jam dhëndër”.
Almeda Abazi ishte kthyer këtë javë në Turqi, një itinerar që e ka ndjekur përgjatë gjithë spektaklit, për t’u rikthyer në Shqipëri me bashkëshortin e saj.
Ajo konfirmoi se, Tolgahan do të bëhet pjesë e spektaklit “Dancing With the Stars”, por u shpreh se roli i tij në finale do të mbetet surprizë deri të shtunën.
Çifti ishte veshur sportiv dhe me të zeza, por detaji në stil që mund t’ju bëjë përshtypje është kapela e Almedës. Në pjesën e përparme të saj është e printuar imazhi i një pule.
Aktori i njohur turk pritet të takojë familjarët e ish-Miss Shqipërisë, me të cilën u martua në shkurt të vitit të kaluar në Los Angeles.
“Iconstyle.al” ka mësuar gjithashtu se çifti do të ketë një takim me kryebashkiakun Erion Veliaj.
