Ditën e sotme nëpërmjet një postimi në Facebook, kryebashkiaku Erion Veliaj na tregoi se më në fund pas shumë kohësh kishte arritur të bëjë një marrëveshje me artistët për nisjen e negociatave për ndërtimin e Teatrit të ri Kombëtar.
Tashmë pr/ligji që parashikon nisjen e ndërtimit të Teatrit të ri Kombëtar pritet që t’i dërgohet Parlamentit së bashku me tre amendime, që siç sqaroi Veliaj, këto janë kërkesat e negociuara më artistët shqiptarë.
Në një lidhje telefonike në “News 24”, Veliaj u shpreh se tre kërkesat e artistëve i dhanë fund ngërçit disa mujor.
“Amendamentet e artistëve që do t’i shtohen ligjit të propozuar nga komuniteti i artistëve janë tre: 1-Të mos preket territori i teatrit ekzistues. 2-të ndërtohet një teatër pa kulla në këtë territor, dhe 3-pjesë e negociatave të bëhen edhe 2 prej përfaqësuesve të komunitetit të tyre. Me këto amendime pr/ligji shkon drejt në parlament”, tha Veliaj.
Ai gjithashtu sqaroi se në territorin ku sot është teatri do të ngrihet vetëm teatri, ndërsa ndërtesa (por nuk specifikoi kullat) do të ngrihet në pjesën e territorit të bashkisë.
“Në territorin e teatrit do kemi vetëm teatrin. Në territorin e Bashkisë do kemi ndërtesë”, tha Veliaj ndër të tjera.
