Diena Karanxha nuk e përballoi dot dhimbjen nga humbja e të bijës dhe ndërroi jetë nga marazi.
Vogëlushja Esiela u nxor nga rrënojat vetëm pas 12 orësh dhe ishte tepër vonë. Ajo kishte humbur jetën.
Dy orë pas vajzës, Diena u nxorr e gjallë nga rrënojat.
“Një orë para se ta nxirrnin, ishte koshiente, por momentet pasi mbesën e nxorën pa frymë nga rrënojat, Diena më thonin kishte ankime, kishte humbur forcat, se më përpara ishte e fortë, kapedane, rezistente”, tregon Marildo Meçja, vëllai i Dienës për “Top Story”.
Diena kishte humbur bashkëshortin 4 vite më parë. Piktori Dorian Karanxha, u nda nga jeta në vitin 2015, në moshën 37-vjeçare pas një ataku kardiak.
“Mendoja gjithmonë që Zoti më kishte dhënë shumë lumturi, duke pasur një shok e një bashkëshort si Dori im, por jeta qenka një sprovë e vërtetë. Më mungon shumë bebi im”, është shprehur Diena.
“Piktura ishte pasioni i Dorit, vjen nga një familje me tradita. Vdiq në moshën 37-38 vjeç, para syve Dienës, ishte dashuria e Dienës, ishin perfekt bashkë, edhe ditë të vështira pas vdekjes së Dorit, periudhën e fundit kishte filluar ta merrte veten”, tregon Marildo Meçja.
“Kam bindje që shteti do të bëjë atë që duhet për drejtësi e të vendosen gjërat në vijë, se ndryshe sistemi shqiptar nuk ka më kuptim”, thotë vëllai i Dienës.
/Top Channel
