Prindërit e 11-vjeçares nga Lutinja e Tepelenës, të cilët denoncuan mësuesin që kishte abuzuar me vajzën e tyre, janë rrëfyer sot për herë të parë.
Ngjarja ndodhi më 19 qershor të këtij viti dhe në atë kohë pati një hetim nga Prokuroria e Gjirokastrës e cila kërkoi arrest me burg për mësuesin 63 vjeçar.
Si përfundim, Gjykata e Gjirokastrës vendosi masën detyrim paraqitjeje për mësuesin, por problemet për familjen nuk mbyllen këtu.
Në studion e emisionit “Me Zemër të Hapur” prindërit deklaruan se do t’i shkojnë deri në fund kësaj çeshtjeje. Ata kanë thënë se jashtë banesës së tyre ka pasur kërcënime me armë.
Familjarët kanë dëgjuar krisma armësh madje kanë bërë edhe denoncimin në Policinë e Gjirokastrës.
“Unë vdes dhe në shkollë nuk shkoj më, kështu më thotë. Natën e krismave në shtëpi vajta të marr ca rroba poshtë, dhe dëgjova të shtëna. Bërtita çfarë bëni se na vratë. Nuk arrita të dalloj gjë se ishte shumë natë. Vajza ishte në gjumë, ndjeu zhurmën e policisë dhe pyeti çfarë është. I thashë se nuk është asgjë, policia po na ruan.
Në ditën e parë të shkollës, drejtori i shkollës dhe mësuesja e anglishtes erdhën në shtëpi, por nuk më siguruan transportin për në shkollë. Shkolla është rreth një orë larg nga banesa, s’mund ta çoj vajzën. Kam frikë. Ajo është një ditë po një ditë jo me temperaturë. Është në stres dhe është dobësuar. Është thelluar situata dhe gjendja emocionale e saj. Më mua rri si e ndrojtur, me vjehrrën flet më shumë. Duhet t’i flasësh 10 herë e nuk të kthen përgjigje, vetëm qan gjithë ditën. Bashkë me vjehrrën kemi një muaj që i flasim për shkollën, po nuk shkoj thotë. Edhe ne e kemi lënë pak, është shumë e stresuar”, tregon nëna e vajzës.
Prindërit kërkojnë strehim dhe mbrojtje për vajzën dhe druhen se edhe vajza e vogël do të mbetet pa shkollë për sa kohë që “krimineli është në rrugë”.
Burimi: BalkanWeb
