Një tjetër prind i shqetësuar ka denoncuar një rast abuzimi në shkollë, të mësuesit 63-vjeçar.
Prindi nga Gjirokastra që e njihte mësuesin Myzo Dida, 63 vjeç, tha në një lidhje telefonike se ai ka abuzuar me një tjetër ish-nxënëse të tij që sot është maxhorene dhe ndodhet në Vlorë.
Ai telefonoi në emisionin “Me zemër të hapur” ku po diskutohej çështja e abuzimit të një 11-vjeçareje nga i njëjti mësues, i cili tashmë është në liri.
“Flas nga Gjirokastra, jam fqinj me atë familjen. Ai mësues i ka dhënë mësim dhe djalit tim. Djali im më ka treguar për një vajzë tjetër që sot është e martuar dhe ndodhet në Vlorë. Dhe ajo është abuzuar. Nxirreni këtë çështje. Mund të hulumtoni. Ai maskarai ka abuzuar me të”, tha prindi gjatë lidhjes Live, raporton “BalkanWeb”.
Pak më herët në emision, familja Muçodemi rrëfeu traumën që po kalojnë pas abuzimit të vajzës 11-vjeçare. Ata kërkuan ndihmë pasi vajza e tyre është mbyllur brenda që kur gjykata ka nxjerrë nga burgu mësuesin. Ajo nuk pranon të kthehet as në shkollë më. Për më tepër nëna e vajzës ka treguar se janë në rrezik për jetën, pasi jashtë shtëpisë së tyre është qëlluar me armë.
Burimi: BalkanWeb
