Bashkia e Tiranës, ashtu siç ka vepruar gjithmonë këto vitet e fundit, vijon t’i zhveshë kulturalisht monumentet me vlerë të Tiranës, për t’i kthyer ato në pallate, ose ndryshe, “ujëvara” të ardhurash.
Vetëm para disa ditësh, në datën 7 janar, pamë se si një vilë historike e kryeqytetit, u kthye në “viktimë” të vendimit të bashkisë për shembjen e saj.
Banesa tip vilë dy katëshe u shpall në vitin 2015 “Monument Kulture Kategoria e Dytë”, me kodin II-229 por mesa duket e humbi këtë status tre vite më pas.
I njëjti institucion i cili 3 vite më parë kishte dhënë urdhrin e mbrojtjes, tashmë jep urdhrin e shembjes.
Kujtojmë që IKTK, DRKK dhe Ministria e Kulturës janë tre institucionet përgjegjëse për ruajtjen dhe mirëmbajtjen e trashëgimisë kulturore në Shqipëri.
Shembja e kësaj vile e shpallur në vitin 2015, “Monument Kulture Kategoria e Dytë”, e çon në 18 numrin e godinave Monument Kulture të shembura pesë vitet e fundit.
Kjo është një shifër jo e zakonshme për institucionet përgjegjëse, veçanërisht për Minsitrinë e Kulturës në Shqipëri.
Për 45 godina/vila Monument Kulture të marra në studim në Tiranë ka 36 urdhra për heqje të statusit, veprim që ka çuar në shembjen e 18 vilave/godinave historike, ku 17 prej tyre janë zëvendësuar me pallate, Sipas investigimit të kryer nga “Citizens Channel”.
Njëkohësisht, zonat që mbajnë mbi shpinë një peshë historike në Tiranë janë kthyer plotësisht në kantiere ndërtimi.
Prej vitit 2015, numri i lejeve të ndërtimit në kryeqytet është 1768. Viti 2016 shënon fillimin e rritjes së vrullshme të ndërtimit, që kulmon me 388 leje në vitin 2018, ndërsa për çdo vit numri i lejeve nuk ka rënë nën 250, shifër 6 herë më e lartë se ajo e vitit 2012.
