Ditën e djeshme u helmuan për herë të dytë një grup nxënësish në gjimnazin “Janaq Kilica” në Fier.
Shkak për helmimin ishte bërë një spraj piperi, për përhapjen e të cilit po hetohen dy 15-vjeçarë me iniciale A.M. dhe A.H.
Sot mësimi ka nisur normalisht pa dalë ende përgjigja e analizës për sigurinë në ambientet e shkollës.
Mirëpo, paniku dhe situata e tensionuar ka vazhduar edhe ditën e sotme tek nxënësit.
Një nxënëse është dërguar me urgjencë në spital pasi është ndjerë keq.
Siç është bërë e ditur, ajo kishte kaluar në gjendje ankthi nga situata kaotike.
Gjithashtu, prindër të nxënësve kanë shoqëruar sot në shkollë fëmijët e tyre dhe kanë tentuar të futen brenda për të parë gjendjen.
Megjithatë, ata nuk janë lejuar dhe kanë pasur debate të ashpra me drejtoreshën dhe mësuesit.
