Është bërë virale pasditen e sotme një deklaratë e ministrit të Turizmit Blendi Klosi, i cili tha se valët e muzikës përhapin më shpejt Covid-19, ndaj dhe është vendosur që të mos lejohet muzika pas orës 20:00 të mbrëmjes.
“As Ministrit të Shëndetësisë nuk i duhet bërë kjo pyetje, por Komitetit të Ekspertëve, që gjykojnë se zonat me muzikë, dhe kjo është e vërtetuar edhe shkencërisht, janë zonat ku virusi përhapet më shumë se në çdo vend tjetër. Kjo pasi valët e muzikës janë ato që përçojnë virusin. Në distancat ku ka valë muzike përhapja e virusit është më e madhe, edhe në ambientet me muzikë sidomos ku përdoret pija alkoolike, njerëzit duke qenë më pranë njëri tjetrit, lëshohen më shumë”, ka deklaruar Klosi.
Duhet ta pranojmë se ky “vërtetim shkencor” për të cilin flet ministri nuk ishte dëgjuar më herët, por duke qenë se ai e beson një teori të tillë, atëherë po e marrim si të mirëqenë se është e vërtetë.
Kështu, pasi na hodhi dritë syve, duke na sqaruar se valët e muzikës transmetojnë Covid-19, atëherë, ministri duhet të na sqarojë edhe disa gjëra të tjera, për të cilat është po aq përgjegjës sa kolegu i tij Sandër Lleshaj.
Si duket dy anëtarët e kabinetit qeveritar nuk bashkëpunojnë me njëri-tjetrin. Nga e dalluam ne do thoni ju?
E thjeshtë! Kjo pasi Blendi Klosi nuk ia ka thënë këtë teori Lleshajt, i cili duke shkelur aktin normativ ka lejuar shkeljen dhe abuzimet nga disa resorte e lokale, që kanë luajtur muzikë gjatë gjithë verës edher pas orës 20:00.
Por, çfarë ka sjellë kjo?
Shkelja e aktit normativ nga vetë qeveria!
Klosi ndoshta nuk e di, por fakti që ai teorinë e tij nuk e ka ndarë me ministrin e Brendshëm ka sjellë shumë pasoja negative.
Kështu, si pikë të parë mund të rendisim aksionet spontane dhe të paorganizuara të Policisë së Shtetit për të mbyllur ose gjobitur lokale të caktuara, duke bllokuar disa bare e duke lënë të lirë lokale nate apo pub-e në zonat bregdetare.
Madje, ne ju kemi njohur edhe me rastin e ‘Prestige resort’, ku urdhri për t’i lënë dorë të lirë biznesit në fjalë, vinte nga lart. (KLIKO)
Në fakt, diçka e tillë nuk na vjen edhe shumë e papritur pasi të dy ministrat e kanë përzemër këtë resort, në të cilin zhvillojnë shpesh mbledhje e takim zyrtare, duke i reklamuar edhe në rrjetet sociale.
Pavarësisht, ankesave dhe denoncimeve të qytetarëve dhe “iconstyle.al” ndaj këtij resorti nuk u mor asnjë vendim, sikundër nuk është marrë për shumë të tjera.
Padrejtësia ndaj bizneseve të tjera
Edhe disa pub-e me emër në jug, si “Folie Marine” “Sanuri”, “Orange Club” etj. prej nga ku janë publikuar shpesh pamje kompromentuese, jo vetëm duke shkelur ligjin me luajtjen e muzikës pas orës 20:00, por edhe duke mos respektuar distancimin fizik, ka vijuar shkelja e ligjit për 2 muajit e verës. (KLIKO)
E kur këto biznese falë mikut e falë lekut kanë arritur të ushtrojnë aktivitetin e tyre si çdo vit tjetër, biznese të tjera të pafata e kanë pësuar ose duke u gjobitur nga Policia, ose duke respektuar ligjin, që në këtë rast përkthehet në humbje.
Kreu i Shoqatës së Bareve dhe Restoranteve në vend, Enri Jahaj, ka treguar për iconstyle.al se shumë biznese po konsiderojnë mbylljen, pasi ju kërkohet qira e plotë, në të kundërt duhet të ndërpresin kontratën dhe të lirojnë ambientin.
Po ashtu, pronarët e shumë bizneseve në kryqytet kanë treguar se ndryshe nga bizneset e mëdha në bregdet që ia hedhin paq gjobave të policisë me muzikën pas orës 20:00 pas lëshimeve të këtyre të fundit, ata nuk do të guxonte kurrë këtu në Tiranë të bënte një shkelje të tillë, nga frika se i bllokojnë aktivitetin. (KLIKO)
Mirëpo, asnjëri prej ministrave nuk është munduar ta vëjë ujin në zjarrr për asnjë nga probematikat e mëposhtme: as për shkeljen e aktit normativ, as për konkurrencën e padrejtë, as për rrezikun e infektimit të qytetarëve.
